وه‌زیری په‌روه‌رده‌ ڕاگه‌یه‌نراوێك له‌سه‌ر بابه‌تی نمره‌ی زمانی كوردی له‌ قوتابخانه‌كانی عێراق بڵاو كرده‌وه‌

وه‌زیری په‌روه‌رده‌ی حكوومه‌تی هه‌رێمی كوردستان ئه‌مڕۆ هه‌ینی ڕاگه‌یه‌نراوێكی له‌سه‌ر بڕیاره‌كه‌ی وه‌زاره‌تی په‌روه‌رده‌ی عێراق بڵاو كرده‌وه‌ سه‌باره‌ت به‌ هه‌ژمارنه‌كردنی زمانی كوردی له‌ قوتابخانه‌كاندا و تێیدا ئاماژه‌ی به‌وه‌ دا كه‌ زمانی كوردی له‌ قوتابخانه‌كانی عێراق ده‌رنه‌چوونی تێدایه‌.

ئاڵان حه‌مه‌ سه‌عید وه‌زیری په‌روه‌رده‌ی هه‌رێمی كوردستان له‌ ڕاگه‌یه‌نراوه‌كه‌دا ڕایگه‌یاند: پاش دەرچوونی گشتاندنێک لە وەزارەتی پەروەردەی عێراقی فیدراڵ لە ( 6ی 10ی 2022) سەبارەت بەوەی زمانی کوردی لە قوتابخانەکانی وەزارەتی ناوبراو دەرنەچوونی تێدا نییە و لە تاقیکردنەوەی گشتیی هەژمار ناکرێت، لەسەر فەرمانی جەنابی سەرۆکی حکوومەتی هەرێمی کوردستان، ئێمە لە وەزارەتی پەروەردە هەر هەمان ڕۆژ لەگەڵیان لە پەیوەندیدابووین.

ڕاشیگه‌یاند: لە ئەنجامی په‌یوه‌ندییه‌كانمان ڕێککەوتین کە شاندێکی وەزارەتی پەروەردەی عێراق سەردانی وەزارەتمان بکەن، بۆیە لە 7ی 10ی 2022 شاندێک لە وەزارەتی پەروەردەی عێراق بۆ ماوەی سێ رۆژ لە هەرێمی کوردستان مانەوە و گفتوگۆکانمان بەردەوام بوو.

ئالان حه‌مه‌ سه‌عید هه‌روه‌ها ڕایگه‌یاند: سەرەنجام کۆنووسێکی هاوبەش نووسراویەوە و بەندە و وەزیری پەروەردەی عێراق لە کابینەی پێشوو لە 13ی 10ی 2022 واژۆمان کرد و ڕەزامەند بووین، مانگێکیش دانرا کە دەبێت هەردوو وەزارەت گشتاندن بەو ڕێککەوتنە دەر بکەین.

وه‌زاره‌تی په‌روه‌رده‌ی گوتیشی: سەرەنجام هەوڵەکانمان سەرکەوتووبوون و لە 24ی 10ی 2022 بەرێوەبەرایەتی گشتیی هەڵسەنگاندن و ئەزموونەکان لە وەزارەتی پەروەردەی عێراقی فیدراڵ، گشتاندنی پێویستی دەرچوواند کە زمانی کوردی (دەرنەچوون)ی تێدایە و ئەگەر قوتابی لە بابەتی زمانی کوردی نەگەیشتە نمرەی پێویستی دەرچوون، ئەوا بەدەرنەچوو دادەندرێت.