بەریتانیا لە ماوەی 90 ڕۆژدا نزیكەی 28 هەزار حاڵەتی نوێی مایەپووچبوونی تۆماركردووە

بەریتانیا لە ماوەی سێ مانگی ڕابردوودا نزیكەی 28 هەزار حاڵەتی نوێی مایەپووچبوونی كەسی تۆماركردووە، ئەمەش هاوكات لەگەڵ قەیرانی تێچووی ژیان لەو وڵاتە و بەرزبوونەوەی بەرچاوی نرخەكان كە بەهۆی دابەزینی بەرچاوی نرخی ئاڵوگۆڕی دراوی پاوەندەوە بووە.
بەپێی دوایین داتا كە لەلایەن دەزگای ئیفلاسەوە دەرچووە، كە هاوكاری پێشكەش بە كەسانی ناڕەحەتی یان ئیفلاس دەكات كە ناتوانن قەرز و پابەندییە داراییەكانیان دابین بكەن، لە چارەكی كۆتایی مانگی ئەیلولی ساڵی ڕابردوودا 27 هەزار و 927 مایەپووچبوونی تاكەكەسی تۆماركراوە.
هەروەها ئەم دامەزراوەیە بە ڕێژەی 18% زیادبوونی ناو تۆماركردنی ئەو كەسانەی بەخۆیەوە بینیوە كە داوای یارمەتی دەكەن لە قەرزە كەسییەكان.
بەپێی داتاكان ئەم ژمارانە بەراورد بە چارەكی پێشوو بەڕێژەی 5% دابەزین تۆمار دەكەن، بەڵام بەراورد بە هەمان ماوەی ساڵی ڕابردوو بەڕێژەی 2% زیاترە.
بە شێوەیەكی فەرمی " مایەپووچبوونی كەسی" پێكدێت لە ئیفلاس و فەرمانی ڕزگاربوون لە قەرزەكان (DRO) كە لەلایەن تاكەكانەوە تۆمار دەكرێن.
DRO ئەو كەسانە دەكاتە ئامانج كە قەرزەكانیان دەگاتە 30 هەزار پاوەند. دەزگای ئیفلاس ڕایگەیاندووە، فەرمانی كەمكردنەوەی قەرزەكان لە چارەكی پێشوو كەمتر بووە بەڵام ئیفلاسەكان كەمێك زیاتر بووە.
ئەمەش لە كاتێكدایە كە هەڵاوسان لە بەریتانیا بەرزبووەتەوە بۆ بەرزترین ئاستی لە ماوەی 40 ساڵدا و 10.1% لە ساڵی كۆتایی هاتنی مانگی ئەیلولدا، ئەمەش بەهۆی بەرزبوونەوەی نرخی خۆراك.
ئەمە دووەمجار بوو كە هەڵاوسان لە بەریتانیا لە ئاستی 10% بەرزبووەوە، بۆ گەڕانەوە بۆ دوو ژمارە دوای كەمێك دابەزینی كەمێك بۆ 9.9% لە مانگی ئابی ساڵی ڕابردوو.
كریستینا فیتزجێراڵد، پسپۆڕی مایەپووچبوونی تاكەكەسی دەڵێت: "هەرچەندە ژمارەی ئیفلاسكردنی كەسی بە بەراورد بە چارەكی كۆتایی دابەزیوە، بەڵام ژمارەكان هێشتا زیاترن لەوەی لەم كاتەی ساڵی ڕابردوودا هەبوون بەهۆی زیادبوونی ژمارەی ئەو كەسانەی داوای داڕشتنەوەی قەرزەكانیان دەكەن.
ئاماژەی بەوەشكردووە، "لەكاتێكدا ڕێژەی بێكاری لە دابەزیندایە، مووچە هاوتەریب نەبووە لەگەڵ هەڵاوسان و خەڵكێكی زیاتر قەرز دەكەن، چونكە ئەو پاوەندەی لە گیرفانیدایە وەك 12 مانگ لەمەوبەر نییە.
هاوكات، لە ماوەی چارەكی كۆتاییدا، ئیفلاسی كۆمپانیا تۆماركراوەكانی ئینگلتەرا و وێڵز بە ڕێژەی 40% بەرزبووەتەوە .