دوای ئەوەی ئەمڕۆ شەممە 05ـی 11ـی 2022 لە شەقامی 100 مەتری شەڕ لەنێوان دوو کەس ڕووی دا بەهۆیەوە ئافرەتێک و یەکێک لە تۆمەتبارەکان برینداربوون.
بەڕێوەبەرایەتی پۆلیسی هەولێر لەمبارەیەوە زانیاری دەدات و ئاماژەی بەوە داوە کە شەڕەکە بەهۆی کێشەیەکی کۆمەڵایەتییەوە ڕووی داوە.
لە ڕوونکردنەوەکەی پۆلیسی هەولێر هاتووە کە لە ئەنجامی شەڕی نێوان دوو کەسدا بە ناوەکانی (گ. ع. ی) و (ک. ا. ھ) تێیدا بە چەکی جۆری کلاشینکۆف تەقە کرا و ئافرەتێک بەناوی (ز. ب. ف) و یەکێک لە تۆمەتبارەکان بە ناوی (ک. ا. ھ) زامدار بوون.
ئەوەش خراوەتەڕوو کە ، دەستبەجێ هێزەکانیان لە بەشی پۆلیسی فریاکەوتن گەیشتنە شوێنی ڕووداو و هەردوو تۆمەتباریان دەستگیر کرد و دەستیشیان بەسەر ئۆتۆمبێلێک و چەکی بەکارهاتوودا گرت.
پۆلیسی هەولێر ئاماژەی بەوەش داوە کە تۆمەتبارانی ناوبراو، پەڕاوی لێکۆڵینەوەیان بۆ ڕێکخرا و ڕادەستی دادگە کران.
کۆمێنت (0)
تا ئێستا هیچ کۆمێنتێک نەکراوە.