دوای ئەوەی پارساڵ بە هۆی بارانبارینێكی زۆر لە شاری هەولێر لافاو دروست بوو، لەسەر ڕاسپاردە و فەرمانی مەسرور بارزانی، سەرۆكی حكومەتی هەرێمی كوردستان، پارێزگای هەولێر جگە لە ئەنجامدانی كۆنفڕانسێك تایبەت بە چارەسەر و ڕێگریكردن لە دووبارەبوونەوەی ئەو كارەساتە و لافاوە، لە ماوەی 5 مانگی ڕابردوودا ئامادەكارییەكی زۆری ئەنجامداوە بۆ ڕووبەڕووبوونەوەی لافاو و ڕووداوی نەخوازراو، كە دەتوانرێت بگوترێت لە ماوەی 15 ساڵی ڕابردوودا كاری لەم شێوەیە بۆ پاككردنەوەی ڕێڕە‌وەكانی ئاو لەپارێزگای هەولێر نەكراوە، بەمشێوەیەی خوارەوە:-
ـ كەندی كۆڕنیش هەر لە سەرەتا‌وە تا كۆتایی پاككراوەتەوە و پرۆسەی پاككردنەوەی تائێستاش بەردەوامە و هەموو ئەو بەربەستانەش لادەبرێت كە لە نێوی دروست كرابوون و ببوونە هۆكاری دروستبوونی لافاو.
ـ لە ڕێگەی تەندەرینگەوە، دوو پردی پتەو لە شوێنی ئەو بەربەستانە دروست دەكرێن كە چارەسەرێكی زۆر باشن بۆ ڕێگریكردن لە دروستبوونی لافاو.
ـ لە كۆتایی گەڕەكی ڕۆشنبیری لە دارەتوو، ئێستا كار لە شەقامێكی دووساید دەكرێت و لەم ڕۆژانە ئەم شەقامەش تەواو دەبێت.
ـ لە گەڕەكی هەولێری نوێ، تیمەكانی بەڕێوەبەرایەتیی ئاودێری لە ڕێگەی چەند تەندەرینگ كەندەكە پاك دەكەنەوە، بەوەش كێشەیەكی ئەوتۆ لە كۆڕنیش نامێنێت و مەترسی دروستبوونی لافاو لەو شەقامە وەك ساڵی پار نییە، چونكە هەمووی پاك كراوەتەوە.
ـ شاری هیران ستی و دەوروبەری كە ساڵی ڕابردوو لافاو گرتیەوە، ئێستا رێڕە‌وێكی نوێی لێ دروست دەكرێت و ئاوەكە دەچێتە بەستی بنەسڵاوە و دواتریش بۆ كۆڕنیش، ئەمەش وا دەكات ئەمساڵ مەترسی لافاو لەسەر ئەو ناوچەیە نەمێنێت، تائێستاش لە 85%ی ئەم پڕۆژە‌یە تەواو بووە.
ـ ئەوەی پەیوەندی بە شەقامی مەسیفەوە هەیە، سەرۆكی حكومەتی هەرێمی كوردستان بە گوژمەی 8 ملیار دینار، بڕیاری پاككردنەوەی ڕێڕە‌وەكانی دەوروبەری شەقامی 150 مەتری دا كە پارساڵ كێشەی دروست كردبوو، ئێستا لە شەوەك و مەلائۆمەر كار دەكرێت، لە گردجوتیاریش تیمەكان كاری بەردەوام دەكەن، له بنەسڵاوەش كەندەكان پاك كراوەتەوە.
ـ لەناو سەنتەری شاری هەولێریش لە ڕێگەی هەر شەش شارەوانیی و بەرێوەبەرایەتیی ژینگەوە، زۆربەی مەنهۆل و ژێر پردەكان و تۆڕە‌كانی ئاو و چەپەرەكان پاك كراونەتەوە پرۆسەی پاككردنەوەكەش بەردەوامە.
ـ هەروەها پۆندێكی گلدانەوەی ئاو لەسەرەوەی ناحیەی دارەتوو دروست دەكرێت، بۆ گلدانەوەی ئاو بۆ كاری جوتیاری و گەشتیاری و ئاوی ئەو ڕێڕەوانەشی كە دەبنە ڕایەڵكەی دروستبوونی لافاو.
ئەمانە هەمووی بەشێكن لەو كارانەی كە لەلایەن پارێزگای هەولێر لەو ماوەیە ئەنجامدراون بۆ رووبەڕووبوونەوەی لافاو و ڕێكارەكانیش لەوبارەیەوە بەردەوامە.
کۆمێنت (0)
تا ئێستا هیچ کۆمێنتێک نەکراوە.