سەرۆكی دەستەی وەبەرهێنان لە هەرێمی كوردستان رایدەگەێنێت، راسپاردەی سەرۆكی حكوومەت ئەوەیە، كە زۆربەی خەڵكی كەمدەرامەت سوود لە یەكەكانی نیشتەجێبوون وەربگرن.
ئەمڕۆ شەممە 13-11-2022 بەردی بناغەی یەكەم پڕۆژەی دروستكردنی 20 هەزار یەكەی نیشتەجێبوون بۆ كرێنشینان لە زاخۆ دانرا.
لەوبارەیەوە دكتۆر محەمەد شوكری، سەرۆكی دەستەی وەبەرهێنان لە هەرێمی كوردستان لە مەراسیمەكەدا رایگەیاند: قۆناغی یەكەمی راسپاردەی سەرۆكی حكوومەتی هەرێمی كوردستان جێبەجێ دەكەین، كە دروستكردنی 20 هەزار یەكەی نیشتەجێبوونە و لە زاخۆ قۆناغی یەكەم دەست پێدەكەین.
هەروەها سەرۆكی دەستەی وەبەرهێنان گوتی: لە ناوچەكانی دیكەش لە دهۆك و هەولێر و سۆران و سلێمانی و گەرمیان و هەڵەبجەش دەست پێدەكەین بە زووترین كات و راسپاردەی سەرۆكی حكوومەت ئەوەیە، كە زۆربەی خەڵكی كەمدەرامەت سوود لە یەكەكانی نیشتەجێبوون وەربگرن.
دكتۆر محەمەد شوكری، گوتیشی: لەسەر راسپاردەی سەرۆكی حكوومەت هەموو ئاسانكارییەك بۆ دروستكردنی یەكەكانی نیشتەجێبوون دەكەین و لیژنەیەكی باڵاش دروست كراوە لە چەندین وەزارەت و سەرپەرشتیی دروستكردنیان دەكات، كە بە جۆرێك دروست بكرێن بە كوالیتییەكی باش كە خەڵك بتوانن بە ئاسوودەیی تێیاندا بژین.
لەلایەكی دیكەوە هەر ئەمڕۆ ئومێد خۆشناو پارێزگاری هەولێر بە كوردستان تیڤی رایگەیاند: مژدە بە خەڵكی كەمدەرامەت و كرێنشین دەدەین، كە لەو ماوەیەدا لەلایەن مەسرور بارزانی، سەرۆكی حكوومەتی هەرێمی كوردستانەوە، بەردی بناغەی شوقەكانی كرێچییان لە هەولێر دادەندرێت.
کۆمێنت (0)
تا ئێستا هیچ کۆمێنتێک نەکراوە.