پاشنيوه‌ڕۆى ئه‌مڕۆ شه‌ممه 2022.11.19 نێچيرڤان بارزانى، سه‌رۆكى هه‌رێمى كوردستان، له سلێمانى به‌شدارى له پرسه‌ى قوربانييانى ئه‌و ڕووداوه دڵته‌زێنه‌دا كرد كه شه‌وى پێرێ پێنجشه‌ممه 2022.11.17 به‌هۆى ته‌قينه‌وه‌ى تانكييه‌كى گازى شل، 15 كه‌س گيانيان له ده‌ست دا و ژماره‌يه‌كى ديكه‌ش بريندار بوون.
له پرسه‌كه‌دا نێچيرڤان بارزانى، سه‌ره‌خۆشى له خێزان و كه‌سوكارى قوربانييان كرد و هاوسۆزى و هاوخه‌ميى قووڵى خۆى له‌گه‌ڵياندا ده‌ربڕى، هه‌روه‌ها هيواى خواست خواى مه‌زن گيانى قوربانييان به به‌زه‌يى و ميهره‌بانيى خۆى شاد بكات و ئارامى و دڵنه‌وايى به خێزان و كه‌سوكاريان و هه‌موو لايه‌ك ببه‌خشێت.
پاشان سه‌رۆكى هه‌رێمى كوردستان، له نه‌خۆشخانه‌ى شار برينداران و به‌ركه‌وتووانى ڕووداوه‌كه‌ى به‌سه‌ركرده‌وه و له نزيكه‌وه به‌دواداچوونى بۆ ڕه‌وشيان كرد، هه‌روه‌ها هيواى زووچاكبوونه‌وه‌ى بۆ خواستن و ئاماده‌يى بۆ پێشكه‌شكردنى هه‌موو هاوكارى و پێويستييه‌ك بۆ چاره‌سه‌ركردنيان ده‌ربڕى.
دواتر له وه‌ڵامى ڕۆژنامه‌نووساندا باسی سه‌ردانه‌كه‌ى بۆ سلێمانی كرد و گوتی: هاتنی ئێمه بۆ شاری سلێمانی، به‌مه‌به‌ستی سه‌ره‌خۆشی بوو له كه‌سوكاری ئه‌و قوربانیيانه‌ی به‌هۆی كاره‌ساتێكه‌وه له‌و شاره ڕوویدا. به ڕاستی كاره‌ساتێكی گه‌وره بوو، هه‌موو كوردستان هه‌ر له زاخۆ تا ده‌گاته خانه‌قین و هه‌موو شوێنه‌كانی هه‌رێمی كوردستان و هاووڵاتيیان له ده‌ره‌وه و ناوه‌وه، هه‌موومان خه‌مبار بووین و هه‌ر یه‌ك له ماڵی خۆیه‌وه خاوه‌نی ئه‌م پرسه‌یه.
هه‌روه‌ها گوتى: ئه‌مڕۆ ئێمه بۆ ده‌ربڕینی سه‌ره‌خۆشی هاتووین بۆ شاری سلێمانی له‌گه‌ڵ جه‌نابی پارێزگار به‌شداریمان كرد له‌و ڕێوڕه‌سمه‌دا و په‌یامی سه‌ره‌خۆشیی خۆمان پێگه‌یاندن. ڕووداوێكی ناخۆش بوو، هه‌ر به‌م بۆنه‌وه ده‌مه‌وێ سوپاسی جه‌نابی پارێزگار بكه‌م بۆ ئه‌وه‌ی ئه‌مڕۆ گوێبیستی بووم كه به‌وپه‌ڕی هه‌ستكردن به به‌پرسیاريه‌تی كه هه‌موویان شاهێدی ئه‌وه‌ن هه‌م جه‌نابی پارێزگار و هه‌م نه‌خۆشخانه‌ی شار و دكتۆر و هه‌موو ستافی نه‌خۆشخانه، به‌رگریی شارستانی، پۆلیس، شاره‌وانی، ئاسایش و خه‌ڵكى خۆبه‌خشی ئه‌م شاره هه‌ر هه‌موویان، ئه‌ركى خۆيان به‌جێهێناوه.
هه‌روه‌ها گوتى: ئه‌م ڕووداوه سۆزێكی له‌سه‌ر ئاستی هه‌موو كوردستان دروست كرد كه ئه‌مه جێی شانازییه بۆ هه‌موومان كاتێك ڕووداوێكی وا ڕووده‌دات هه‌موو به‌یه‌كه‌وه هه‌وڵ ده‌ده‌ین یارمه‌تیده‌ر بین. سوپاسی یه‌ك به‌یه‌كه‌یان ده‌كه‌م كه به‌شدار بوون و خزمه‌ت و كاریان كردووه و ده‌ستیان ده‌گوشم و سوپاسیان ده‌كه‌م. ئێمه هاوبه‌شی خه‌می ئه‌و خێزانه‌ین، هیوادارین حكوومه‌تیش به‌دواداچوونی پێویست بكات تا به وردی بزانین سه‌رچاوه‌ی كێشه‌كه له‌كوێ بووه و بۆچى ئه‌مه ڕوویداوه؟ بێگومان ئه‌وه ده‌بێت ببێته وانه‌یه‌ك تا هه‌وڵ بده‌ین له‌مه‌ودوا ئه‌و شتانه‌ی كه پێویسته بۆ هێمنایی و ئه‌منییه‌ت و سه‌لامه‌تی، وردتر له‌سه‌ری بوه‌ستین.
سه‌باره‌ت به هاریكارییه‌كانی سه‌رۆكایه‌تیی هه‌رێم بۆیان، ڕایگه‌یاند: هه‌موومان ده‌بێت به‌شداری له‌وه‌دا بكه‌ین، ئه‌وه‌ی پێویست بێت بۆ ئه‌م خێزانه ئه‌نجامی بده‌ین و بێگومان حكوومه‌تیش ئه‌ركى خۆی جێبه‌جێ ده‌كات، هه‌ر كه‌سێكیش بیه‌وێت كاری خێرخوازی بكات، سه‌رۆكایه‌تیی هه‌ر حزبێك و هه‌ر كه‌سایه‌تییه‌ك بێت، ئێمه سوپاسیان ده‌كه‌ین، پێخۆشحاڵ ده‌بین.
ده‌رباره‌ی هه‌ستی سەرۆکی هەرێم له به‌شداریكردنی پرسه‌كه و ڕێوشوێنه‌كان بۆ دووباره‌نه‌بوونه‌وه‌ی ڕووداوی هاوشێوه، نێچیرڤان بارزانی ئاشكرای كرد: به ڕاستی ڕووداوێكی تا بڵێی ناخۆش بوو، ئه‌مڕۆ له كوردستان دوور له‌وه‌ی كه به‌پرسیاريه‌تيی من یان به‌رپرسیاريه‌تيی ئه‌وی دیكه چییه، هه‌موومان خه‌مبارین و ئه‌مڕۆ له هه‌موو ماڵێك تازیه هه‌یه و ئه‌و كاره‌ساته‌ی كه ڕوویدا، به ئه‌ركى خۆمان زانیوه سه‌ردانیان بكه‌ین تا له نزیكه‌وه بیانبینین، بێگومان هه‌رچییه‌كیش پێویست بێت بۆیان ئه‌نجام ده‌ده‌ین.
له وه‌ڵامى پرسيارێكى ديكه ده‌رباره‌ى كێشه‌ى سووته‌مه‌نی، هه‌روه‌ها دوا بڕیاری سه‌رۆكایه‌تیی هه‌رێمی كوردستان ده‌رباره‌ی هه‌ڵبژاردن و واده‌ی ئه‌نجامدانی، سه‌رۆكی هه‌رێمی كوردستان گوتی: مه‌سه‌له‌كه سه‌لامه‌تییه، بێگومان حكوومه‌ت لێكۆڵینه‌وه له‌و ڕووداوه ده‌كات و ده‌بێت ئه‌و هه‌نگاوانه‌ی كه پێویسته بۆ زیاتر پاراستنی سه‌لامه‌تیی هاووڵاتییان بنرێن، چونكه كاری حكوومه‌ت ئه‌وه‌یه كه خزمه‌تگوزاری بۆ هاووڵاتیانی هه‌رێمی كوردستان دابین بكات، بۆیه بێگومان وه‌ك هه‌ر شتێكی دیكه حكوومه‌ت له‌سه‌ر ئه‌م بابه‌ته ده‌وه‌ستێت و هه‌ڵوه‌سته‌ی له‌سه‌ر ده‌كات و هه‌رچی پێویست بێت له ڕێنمایی و گۆڕینی یاسا و هه‌رچییه‌ك پێویست بێت جێبه‌جێی ده‌كات.
کۆمێنت (0)
تا ئێستا هیچ کۆمێنتێک نەکراوە.