گومان ده‌كرێ فه‌ریده موڕادخانی كچی برای عه‌لی خامه‌نه‌یی ڕێبه‌ری باڵای شۆڕشی ئێران له‌لایه‌ن هێزه ئه‌منییه‌كانه‌وه ده‌ستگیر كرابێت دوای ئه‌وه‌ی ڕه‌خنه‌ی له ده‌سه‌ڵاتداران گرتبوو و به "تاوانبار و بكوژی منداڵان" ناوی هێنابوون.
مه‌حموود موڕادخانی له تۆڕی كۆمه‌ڵایه‌تی تویته‌ر بڵاوی كرده‌وه: فه‌ریده‌ی خوشكم له ڕۆژی چوارشه‌مه‌وه ده‌ستبه‌سه‌ر و بێ سه‌روشوێنه دوای ئه‌وه‌ی له‌سه‌ر داوای داواكاری گشتی سه‌ردانی ئه‌و فه‌رمانگه‌یه‌ی كردبوو.
مه‌حموود موڕادخانی هه‌روه‌ها ره‌خنه‌ی توندی له سه‌ركوتكردنی ناڕه‌زایه‌تیخوازان و خۆپیشانده‌ران گرت و هه‌روه‌ها ڕه‌خنه‌شی له كۆمه‌ڵگه‌ی نێوده‌وڵه‌تی گرت كه تا ئێستا له ئاست هاووڵاتییانی ئێران بێ هه‌ڵوێستن.
داواشی له حكوومه‌ت و ده‌سه‌ڵاتدارانی ئێران كرد واز له تاوانكاری و منداڵكوشتن بهێنن.
موڕادخانی هه‌روه‌ها گوتی: ئه‌م ده‌سه‌ڵاته دڵسۆز نییه بۆ هیچ كام له بنه‌ما ئاینییه‌كان و هیچ یاسا و ڕێسایه‌ك نازانێت جگه له هێز و پاراستن و مانه‌وه‌ی ده‌سه‌ڵاتی خۆی به هه‌ر شێوه‌یه‌ك بۆی بگونجێ.
سه‌باره‌ت به‌و سزایانه‌ی كه له‌لایه‌ن كۆمه‌ڵگه‌ی نێوده‌وڵه‌تییه‌وه به‌سه‌ر حكوومه‌تی ئێران سه‌پێنراوه ڕایگه‌یاند كه ئه‌و سزایانه جێگه‌ی گاڵته‌ن و جه‌ختیشی كرده‌وه كه گه‌لی ئێران به‌ته‌نیا جێهێڵدراوه بۆ خه‌باتی ئازادی.
کۆمێنت (0)
تا ئێستا هیچ کۆمێنتێک نەکراوە.