مەسرور بارزانی سەرۆکی حکوومەتی هەرێمی کوردستان ئەمڕۆ دووشەممە 28ـی 11ـی 2022 پێشوازی لە شاندێکی باڵای ژووری بازرگانیی کلدانی ئەمەریکی و دامەزراوەی کۆمەڵگەی کلدانییەکان بە سەرۆکایەتی مارتن مەننا کرد.
سەرۆکی ژووری بازرگانیی کلدانی ئەمەریکی و کۆمەڵگەی کلدانییەکان کورتەیەکی دەربارەی کار و چالاکیی و پڕۆژەکانیان لە ئەمریکا، ھەرێمی کوردستان و دەشتی نەینەوا خستەڕوو، هاوکات ئامادەیی تەواوی خۆشیان بۆ بەشداریکردنی کارا لە پڕۆسەی ئاوەدانکردنەوە و گەشەپێدانی کوردستان نیشان دا.
مەسرور بارزانی سەرۆکی حکوومەتی هەرێمی کوردستان لە دیدارەکە ئاماژەی بەوە دا کە کوردستان، نیشتمانیی ھەموومانە بە گشت پێکھاتە نەتەوەیی و ئایینییە جیاوازەکانەوە و پێویستە ھەموومان، ھاوکار و یارمەتیدەر بین لەپێناو زیاتر پێشخستنی ھەرێمی کوردستان و پەرەپێدانی کولتووری بەیەکەوەژیانی ئاشتییانەی نێوان پێکھاتەکان.
سەرۆکی حکوومەت پشتیوانیی ھەرێمی کوردستانی بۆ داخوازییە ڕەواکانی کریستییانەکان و پێکھاتە جیاوازەکانی دەشتی نەینەوا و ناوچە کوردستانییەکانی دەرەوەی ھەرێم دووپات کردەوە و جەختی لە گرنگیی چارەسەرکردنی کێشەکانی ئەو ناوچانە، لە چوارچێوەی ماددەی 140ی دەستوور کردەوە.
کۆمێنت (0)
تا ئێستا هیچ کۆمێنتێک نەکراوە.