هۆکاری کەمکردنەوەی ئەمپێری کارەبا ئاشکرا دەکرێت

گوتەبێژی وەزارەتی كارەبا دەڵێت، كارەبای ماڵان لە سبەی ‏پێنجشەممە 01ـی 12ـی 2022 لە 40 ئەمپێرەوە بۆ 30 ئەمپێر كەمدەكرێتەوە و ‏هۆكارەكەشی ڕوون دەكاتەوە.

ئومێد ئەحمەد، گوتەبێژی وەزارەتی كارەبای هەرێمی كوردستان ڕایگەیاند: لە سبەی پێنجشەممەوە ‏پێدانی كارەبای نیشتمانی لە 40 ئەمپێرەوە بۆ 30 ئەمپێر ‏كەم دەكرێتەوە.

ڕاشیگەیاند: گوشارێکی زۆرمان لەسەرە و بەرهەمهێنانی ‏كارەبامان 3 هەزار و 400 مێگاواتە، بەڵام ئێستا خواست بۆ6  هەزار و 500 مێگاوات ‏بەرزبووەتەوە، بۆیە بەناچاری كارەبا لە 40 ئەمپێرەوە بۆ‏‏ 30 ئەمپێر كەم دەكەینەوە.

ئومێد ئەحمەد هەروەها باسی لەوە کرد کە "ساڵی ڕابردووش بەناچاری هەمان ‏ڕێگەمان گرتەبەر و تاوەكو كۆتایی مانگی شوبات بەردەوام بووین، بۆیە ‏پێشبینی دەكەین ئەمساڵیش تاوەكو كۆتایی مانگی شوبات بەمجۆرە ‏بێت."

گوتەبێژی وەزارەتی کارەبا ئاماژەی بەوەش دا کە "لە وەرزی زستاندا بەهۆی ئەوەی خەڵک كارەبا بۆ خۆگەرمكردنەوە ‏بەكاردەهێنن، خواست لەسەر بەكارهێنانی كارەبا زۆر دەبێت."