ئه‌مشه‌و یه‌كشه‌م له فڕۆكه‌خانه‌ی نێوده‌وڵه‌تی به‌غدا له كاتی هه‌ڵسانی فڕۆكه‌یه‌ك كێشه له تایه‌كانی دروست ده‌بێت و به‌هۆیه‌وه ماوه‌یه‌ك فڕۆكه‌خانه‌كه به‌ڕووی نیشتنه‌وه‌ی فڕۆكه‌كان داده‌خرێت.
میدیاكانی به‌غدا بڵاویان كرده‌وه: ئه‌مشه‌و له كاتی هه‌ڵسانی یه‌كێك له فڕۆكه‌كانی هێڵی ئاسمانی عێراقی له‌نێو ڕێڕه‌وی فڕیندا كێشه له یه‌كێك له تایه‌كانی دروست ده‌بێت، به‌هۆیه‌وه له كۆتایی ڕێڕه‌وی فڕینه‌كه‌دا به‌ناچاری ده‌وه‌ستێت.
بڵاویش كرایه‌وه: وه‌ستانی فڕۆكه‌كه له‌نێو ڕێڕه‌وی فڕینی فڕۆكه‌خانه‌ی به‌غدا وای كردووه هه‌موو ئه‌و فڕۆكانه‌ی به نیازی نیشتنه‌وه‌بوون ناچار بكرێن ماوه‌یه‌ك له ئاسمان بمێننه‌وه و له چاوه‌ڕوانیدا بن.
جه‌ختیش كرایه‌وه كه له كۆتاییدا دوای ماوه‌یه‌ك تیمه‌كانی فڕۆكه‌خانه توانیویانه فڕۆكه‌كه ببنه شوێنێكی سه‌لامه‌ت و ڕێڕه‌وی نیشتنه‌وه بۆ فڕۆكه‌كانی تر ئاسایی بكه‌نه‌وه.
کۆمێنت (0)
تا ئێستا هیچ کۆمێنتێک نەکراوە.