لەسەر رێگایەکی خێرا لە باکووری رۆژئاوای کۆلۆمبیا، رۆچوونی زەوی روویدا، بەپێی ئامارە بەراییەکان سێ کەس گیانیان لەدەستداوە و زیاتر لە 20 کەسیش کەوتوونەتە ژێر داڕمانەکەوە.
لەسەر رێگای کالی-کۆندۆتۆ لە پارێزگای ریسارالدا سەربە هەرێمی کالداس باکووری رۆژئاوای کۆلۆمبیا، رۆچوونی زەوی روویدا.
لە رووداوەکەدا، ژمارەیەکی زۆر ئۆتۆمبێل کەوتنە ژێر داڕمانەکە و تا ئێستا سێ کەس گیانیان لەدەستداوە و زیاتر لە 20 کەسیش ژێر داڕمانەکە کەوتوون.
هاوکات ژمارەیەکی زۆر تیمی بەرگریی شارستانی، ئاگرکوژێنەوە، پۆلیس و ئۆتۆمبێلی فریاکەوتن رەوانەی ناوچەکە کراون.
پارێزگاری ریسارالدا، ڤیکتۆر مانوێل تامایۆ لە لێدوانێکی رۆژنامەوانییدا، باسی لەوە کرد کە تا ئێستا نۆ کەس لەژێر داڕمانەکەدا بە سەلامەتی رزگار کراون و کارەکانی گەڕان و رزگارکردنیش بێ وەستان بەردەوامە.
سەرکۆماری کۆلۆمبیا، گوستاڤۆ پێترۆ لە هەژماری خۆی لە تۆڕی کۆمەڵایەتی نیگەرانیی خۆی لەبارەی رووداوەکە دەربڕی و رایگەیاند: هەموو هەوڵێک دەدرێت بۆ رزگارکردنی ئەوانەی کەوتوونەتە ژێر داڕمانەکەوە. نۆ کەس رزگار کراون. سێ کەس گیانیان لەدەستداوە و هەوڵەکان بەردەوامن بۆ رزگارکردنی زیاتر لە 20 کەس. ئەمە تراجیدیایەکە.
بەهۆی بارانی بەلێزمەوە کە چەند مانگێکە لە کۆلۆمبیا بەردەوامە، لافاو و رۆچوونی زەوی روویانداوە و بەهۆیانەوە ژمارەیەکی زۆر کەس گیانیان لەدەستداوە.
کۆمێنت (0)
تا ئێستا هیچ کۆمێنتێک نەکراوە.