تەسبیح بریتییە لە كۆكردنەوەی چەند دەنكۆڵەیەكی ئەندازەیی لە ماددەی بەرد، دار و پلاستیك بە شێوەیەكی بازنەیی لە دەزووێكدا، ئەو تەسبیحە لە نەریتە جیاوازەكاندا بۆ مەبەستی جیاجیا بەكاردەهێندرێت و چەندین قەبارە و رەنگ و ماددەی هەیە.
لەوبارەیەوە فەرهاد چەراخ، دانیشتووی پارێزگای هەولێرەو ماوەی هەشت ساڵە خەریكی دروستكردنی تەسبیحە،دەڵێت:پێشتر كە ئارەزووم لەسەر تەسبیح هەبوو، مەواد و شتەكانم دەكڕی و دەمدایە وەستایەك بۆ ئەوەی تەسبیحم بۆ دروست بكات، زۆرجار كارەكەیان دوادەكەوت، منیش بەهرەم لە كاری دەستی هەیە بۆیە بڕیارمدا بۆخۆم تەسبیح دروست بكەم و سەرەتا كارەكانم بە شێوازی نەریتیی دەكرد و زۆرجار هەبوو كەسوكارم پرسیاریان دەكرد كە بەچییەوە خەریكم و پێیان سەیر بوو دەستم داوەتە كارێكی دەستی كە پێشتر ئەزموونم لێی نەبووە، چونكە كاری بڕینی دەنكەكانم لە رێگای مشاری دەستییەوە دەكرد، یەكەم تەسبیحم دروست كرد كونی دەنكەكانی خوار و خێچ بوو، چونكە یەكەم ئەزموونم بوو، بەڵام رۆژ بە رۆژ گرنگیم بە كارەكەم دەدا و دواتر ئامێری دیكەم كڕی و ئێستاش سەرجەم ئامێرەكانی دروستكردنی تەسبیحم هەیە.
ئەو پیشەوەرە ئاماژە بەوە دەكات كە خواستی لەسەر تەسبیحێكی گرانبەها زیاتر وایكردووە كە پەرە بە كارەكەی بدات و گوتیشی: رۆژێك بە بازاڕدا دەڕۆیشتم، تەسبیحێك سەرنجی راكێشام، منیش پرسیاری نرخەكەیم كرد و تەسبیحفرۆشەكە گوتی گرانە و نرخی 450 هەزار دینارە، منیش تەسبیحێكەم لێی كڕی و ئەوەش بووە هۆكارێكی دیكە بۆ ئەوەی لە كارەكەم بەردەوام بم و بیر لە داهێنان بكەمەوە.
لەبارەی جۆر و كارەكانی دروستكردنی تەسبیح، فەرهاد چەراخ گوتی: جۆری كەهرەمان (كارەبا) زۆر ناسكە و نرخیشی گرانە بەهۆی ئەوەی ماددەكەی بەردە، ماددەكە لە شیلەی دارێك دروست بووە، ئەو شیلەیە دواتر لە دارەكە كەوتووەتە خوارەوە بۆ ناو دەریا، دوای چەندەها ساڵ دەبێتە بەرد و دەتوانین لە دروستكردنی تەسبیح بەكاری بهێنین.
بە گوتەی ئەو پیشەوەرە جۆری كەهرەمان لە رێگای چەند تاقیكردنەوەیەك دەناسرێتەوە و ئەو دەڵێت: ئەگەر ماددەی كەهرەمان لە ئاوێكی خوێواوك دابنرێت ئەوا سەرئاو دەكەوێت، هەروەها بۆنێكی تایبەتی هەیە، جگە لەوەش هێزی راكێشانی هەیە بەجۆرێك دەنكەكانی لەیەكتربخشێنی ئەوا هێزی راكێشان دروست دەكات و دەتوانێت وردە خۆڵ و سۆتەكی جگەرە لە زەوی هەڵگرێتەوە و هێزێكی موگناتیسی دروست دەكات.
فەرهاد ژمارەیەكی زۆر تەسبیحی لە ژوورەوە هەڵواسیووە و وەك خۆی دەڵێت بە دروستكردنی لامپا، فانۆس و پیاڵە چەند داهێنانێكی لە دروستكردنەكەیدا كردووە و گوتی: "جیا لە دروستكردنی دەنكە خڕ و هێلكەییەكانی تەسبیح، ئەوا لامپا، فانۆس و پیاڵە و ژێرپیاڵەشم لە نێوان دەنكەكە و ئیمامەكەدا دروستكردووە، دەمەوێت ئەو شتە كۆن و فۆلكلۆرانەی لە پێشدا هەبوون، ئێستا وەكو یادگارییەك لە دروستكردنی تەسبیحدا زیندوویان بكەمەوە.
کۆمێنت (0)
تا ئێستا هیچ کۆمێنتێک نەکراوە.