فوئاد حوسێن: رێگا نادەین هیچ رێكخراوێك خاكی عێراق بۆ هێرشكردنە سەر وڵاتانی دراوسێ بەكار بهێنێت

فوئاد حوسێن، وەزیری دەرەوەی عێراق، رایگەیاند كە وڵاتەكەی پابەندە بەوەی رێگانەدات، خاكەكەی لەلایەن هیچ رێكخراوێكەوە بۆ هێرشكردنە سەر وڵاتانی دراوسێ بەكار بهێندرێت.
دوای كۆبوونەوەی فوئاد حوسێن، وەزیری دەرەوەی عێراق و ئەیمەن سەفەدی ،وەزیری دەرەوەی ئوردن و سامح شوكری، وەزیری دەرەرەی میسر، لە عەممان كۆنگرەیەكی رۆژنامەوانیی هاوبەش ساز كرا.
وەزیری دەرەوەی عێراق لە وەڵامی پرسیارێك سەبارەت بە دەستوەردانە دەرەكییەكان گوتی: دەستوەردانە دەركییەكان لەلایەن وڵاتانەوە لە عێراق زۆربوون، لەئێستادا لە گفتوگۆی بەردەوام داین لەگەڵ ئەو وڵاتانە.
گوتیشی: پابەندی دەستوورییمان هەیە، لەوەی رێگانەدەین هیچ رێكخراوێك، خاكی عێراق بۆ هێرشكردنە سەر وڵاتانی دراوسێ بەكار بهێنێت.
فوئاد حوسێن لەبارەی بەستنی كۆنگرەی بەغدا بۆ هاریكاری و هاوبەشیی گوتی: یەكەمین كۆنگرە بۆ پاڵپشیكردن لە عێراق بەسترا كە توركیا و ئێران تیایدا بەشداربوون و پێشبینی دەكەین لە كۆنگرەی داهاتوویشدا بەشداری بكەن.
"شامی نوێ" ناوی پڕۆژەیەكی هاوكاری عەرەبییە كە عێراق، ئوردن و میسر لەخۆدەگرێت و لەسەر بنەمای لێكتێگەیشتنی ئابووریی و سیاسیی نێوان ئەم وڵاتانە كە دەكەونە دڵی رۆژهەڵاتی ناوەڕاستەوە، بنیاتنراوە.