دیاری و خەڵاتی ڕێزلێنان پێشكەش بە دوو یاریزانی ڕانیه‌ كرا

دوو گەنجی تازە پێگەیشتووی دەڤەری ڕاپەڕین به‌ناوی (جێگر حه‌مەد ئەمین  تەمەن 22 ساڵ و خەڵکی ڕانیە ) و ( ئاڤار ئەحمەد تەمەن 19 ساڵ و خەڵکی سەنگەسەر لە دەڤەری پشدەر ) بەشداریان لە ڕاکردنی بەکۆمەڵی نێودەوڵەتی بەیروت ـی پایتەختی ووڵاتی لوبنان کرد ، کە بە بەشداری 35 هەزار وەرزشوان لە ڕۆژی 13 / 11 /2022 ڕێکخرا بوو، بۆ ڕاکردنی 5 کیلۆمەتری و 10 کیلۆمەتری و 21 کیلۆمەتری و 42 کیلۆمەتری .
 جێگر حەمەد ئەمین لە ڕاکردنی 42 کیلۆمەتری  پلەی 14 لەئاستی گشتی و پلەی 2 لەسەر ئاستی تەمەن بەدەست دێنێت کە 5000 وەرزشوانی نزیکەی 60 ووڵات بەشداریان تێدا کردبوو .
 هەروەها  ئاڤار ئەحمەد لە ڕاکردنی 10 کیلۆمەتری بە بەشداری زیاتر لە دەهەزار  وەرزشوان  پلەی 7 بەدەست دێنێت.
 بۆ ڕێزگرتنیش لەو دوو وەرزشوانە ئەمڕۆ 7 /12 /2022  لە ناوەندی وەرزش و لاوانی ڕانیە  دیاری و خەڵاتی ڕێزلێنان لە لایەن بەڕێوەبەری ناوەندی وەرزش و لاوانی ڕانیە خاتوو شیلان سەعید و  یاریزانێکی دێرینی ڕانیە کاک عەلی ڕەسول  پێشکەش بەو دوو یاریزانە کرا .
 ئەوانیش لای خۆیانەوە سوپاسی ناوەندی وەرزش و لاوانیان کرد بۆ بەسەرکردنەوەیان و پاڵپشتی و هاندانیان بۆ بەردەوامیان لە وەرزش و هێنانەدی ئاواتەکانیان .