وه‌زاره‌تی ناوخۆی عێراق ڕوونكردنه‌وه‌ی له‌سه‌ر هه‌لی دامه‌زراندن له هێزه‌كانی پاسه‌وانی سنوور ده‌ركرد و تێیدا ڕایگه‌یاند كه دامه‌زراندنه‌كه هاووڵاتییانی هه‌رێمی كوردستانیش ده‌گرێته‌وه.
سه‌عد معه‌ن به‌ڕێوه‌به‌ری ڕاگه‌یاندن و په‌یوه‌ندییه‌كانی وه‌زاره‌تی ناوخۆ له به‌یاننامه‌یه‌كدا ڕایگه‌یاند: ده‌رگه‌ی دامه‌زراندن له هێزه‌كانی پاسه‌وانی سنوور سه‌ر به وه‌زاره‌تی ناوخۆ هاووڵاتییانی هه‌رێمی كوردستان و سه‌رجه‌م پارێزگاكانی تری عێراقیش ده‌گرێته‌وه.
ڕاشیگه‌یاند: ئه‌م دامه‌زراندنه له هێزه‌كانی پاسه‌وانی سنوور بۆ به‌هێزكردنی سه‌رچاوه مرۆییه‌كانه له ناوچه سنوورییه‌كان له‌گه‌ڵ وڵاتانی دراوسێ.
ئه‌م لێدوانه‌ی به‌ڕێوه‌به‌ری ڕاگه‌یاندن و په‌یوه‌ندییه‌كانی وه‌زاره‌تی ناوخۆ له كاتێكدایه كه له چه‌ند رۆژی ڕابردوودا ده‌نگۆی ئه‌و بڵاوكرابووه‌وه كه ڕاگه‌یاندنی هه‌لی دامه‌زراندن له هێزه‌كانی پاسه‌وانی سنوور ته‌نیا هاووڵاتییانی پارێزگاكانی ناوه‌ڕاست و باشووری عێراق ده‌گرێته‌وه.
وه‌زاره‌تی ناوخۆی عێراق پێشتر ئاماژه‌ی به‌وه‌دابوو كه بۆ پاراستنی ناوچه سنوورییه‌كانی هه‌رێمی كوردستان له‌گه‌ڵ وڵاتانی دراوسێ 3 هه‌زار كه‌س داده‌مه‌زرێنن.
کۆمێنت (0)
تا ئێستا هیچ کۆمێنتێک نەکراوە.