وه‌زاره‌تی په‌روه‌رده‌ی حكوومه‌تی هه‌رێمی كوردستان ئه‌مڕۆ پێنجشه‌م خزمه‌تگوزارییه‌كی گرینگی له سیسته‌می ئه‌لیكترۆنی (E-Parwarda) ڕاگه‌یاند كه تێیدا دایك و باوك و به‌خێوكه‌ری قوتابییان ده‌توان له ڕێگه‌یه‌وه ئاستی قوتابییه‌كانیان بزانن.
وه‌زاره‌تی په‌روه‌رده له‌باره‌ی خزمه‌تگوزارییه‌كه ده‌ڵێت: خزمەتگوزاریی ئی- هەڵسەنگاندن E-Halsangandn)) خزمەتگوزارییەکی نوێی دیجیتاڵی وەزارەتی پەروەردەیە، ئاسانکاریی بۆ بەخێوکاری قوتابییان دەكات كە لە دۆخی پەروەردەیی و فێربوونی منداڵەکانیان بە ئەگابن.
هه‌روه‌ها ده‌ڵێت: ئەم خزمەتگوزارییە بۆ ئەم ساڵی خوێندن ( 2022-2023 ) بە شێوەی ئەزموونی لە (28) بیست و هەشت قوتابخانەی حکوومی و ناحکوومی کوردستان دەستی پێ كردووە.
ده‌شڵێت: بە خێوکاری قوتابی پێویستە لەلایەن کارگێڕی قوتابخانەکەیەوە پاسۆرد و یوزەرنەیمی تایبەت بە منداڵەکەی وەربگرێت، هه‌روه‌ها مامۆستای هەر بابەتێک دوو هەفتە جارێک هەڵسەنگاندن بۆ قوتابییەكان دەكات و ئاستەكانیان بۆ بەخێوکارەکانیان دەنێرێتەوە، هەروەها لە ڕەوشی پەروەردە و فێرکاری منداڵەکانیان ئاگاداریان دەكاتەوە.
ئاستەکانی هەڵسەنگاندن بریتین لە :
1- ئاستی ئامادەبوون.
2- ئاستی چالاکیی ناو پۆل.
3- ئاستی هێنانی پێداویستییەکانی خوێندن بۆ ناو پۆل .
4- ئاستی بەئاگابوون و وریایی ناو پۆل.
5- ئاستی ڕەفتار و ئاكار .
6- ئاستی نمرە و هەڵسەنگاندن و تاقیکردنەوەکان.
7- ئاستی تەندروستی.
وه‌زاره‌تی په‌روه‌رده ئاماژه‌ی به‌وه‌ش دا: بەڕێوەبەری قوتابخانە و مامۆستای بابەت و رێنمایکاری پەروەردەیی ئەگەر بیانەوێت لە دەرەوەی ئەو هەڵسەنگاندنە گفتوگۆ لەگەڵ بە خێوکاری قوتابی بکەن، دەتوانن پەیامێکی ئەلیکترۆنی بۆ بەخێوکاری قوتابی بنێرن، ڕۆژ و ڕێکەوت و کاتی دیدارەکە لە ناو قوتابخانە رێك بخەن، هەروەها مامۆستا و ڕێنمایکاری پەروەردە لە ناردنی پەیامەکەیاندا دەبێت هەماهەنگی پێشوەختە لەگەڵ بەڕێوەبەری قوتابخانەكەدا بکەن.
بڵاویشی كرده‌وه: ئەم پلاتفۆرمە وێڕای ئەوەی لەسەر حەوت ئاست هەڵسەنگاندن بۆ قوتابییان دەكات، هاوكات سێ بەشی دیکەی گرینگ لەخۆ دەگرێت کە بەخێوكارانی قوتابی دەتوانن سوودی لێ وەربگرن :
1- دەتوانن تێكڕای نمرەی منداڵەكانیان ببینن، هەر بە خێوکارێک دەتوانێت تەنها نمرەی منداڵەكانی خۆی ببینێت.
2- دەتوانن خشتەی وانەگوتنەوەی مامۆستایان ببینن و بزانن ڕۆژانە منداڵەكانیان چ وانەیەك دەخوێنن.
3- دەتوانن سوود لە ڕێنمایی گشتیی خێزانی بۆ چۆنیەتیی مامەڵەكردن لەگەڵ منداڵەكانیان وەربگرن.
وه‌زاره‌تی ڕاشیگه‌یاند: دەستەواژەكانی هەڵسەنگاندن بە پرس و ڕاوێژ لەگەڵ کەسانی پسپۆڕ داڕێژراون کە بۆ بەرەوپێشچوون و باشتربوون، شێوازی پەروەردەییانە و هاندانی قوتابییان و كەسوكاری قوتابییان ڕەچاو كراوە.
هه‌روه‌ها پلاتفۆرمەکە بە زمانەکانی کوردی: (سۆرانی - بادینی) ، ئینگلیزی ، عەرەبی ، سریانی ، تورکمانی ، بەردەستە.
له‌م كورته ڤیدیۆیه‌ی خواره‌وه زانیاری له‌سه‌ر خزمه‌تگوزارییه‌كه ده‌خرێته‌‌ڕوو:-
کۆمێنت (0)
تا ئێستا هیچ کۆمێنتێک نەکراوە.