ئه‌مشه‌و یه‌كشه‌م له كه‌مپی ئاواره‌كان له به‌حركه له شاری هه‌ولێر ئاگر كه‌وته‌وه و به‌هۆیه‌وه گه‌نجێكی ته‌مه‌ن 17 گیانی له‌ده‌ست دا.
عارف عه‌بدوڵا به‌رپرسی كه‌مپی به‌حركه تایبه‌ت بۆ ماڵپه‌ڕی (كوردستان تیڤی) ڕایگه‌یاند: ئه‌مشه‌و ئاگر له به‌شێك له كه‌ره‌ڤانه‌كانی كه‌مپی به‌حركه له شاری هه‌ولێر كه‌وته‌وه.
ڕاشیگه‌یاند: به‌گوێره‌ی زانیارییه سه‌ره‌تاییه‌كان ئاگره‌كه به‌هۆی شۆڕتی كاره‌باوه دروستبووه كه سه‌ره‌تا له كه‌ره‌ڤانه‌یه‌ك سه‌ری هه‌ڵداوه، دواتر په‌ڕیوه‌ته‌وه بۆ چه‌ند كه‌ره‌ڤانه‌یه‌كی تر و بووه‌ته هۆكاری سووتانی 5 كه‌ره‌ڤانه‌ی نیشته‌جێبوونی ئاواره‌كان.
هه‌روه‌ها ڕایگه‌یاند: به‌داخه‌وه له ڕووداوه‌كه‌دا گه‌نجێكی ته‌مه‌ن 17 ساڵ گیانی له‌ده‌ستداوه.
ئاماژه‌ی به‌وه‌ش دا كه تیمه‌كانی به‌رگریی شارستانی هه‌ولێر گه‌یشتوونه‌ته شوێنی ڕووداوه‌كه و توانراوه به ماوه‌یه‌كی كه‌م ئاگره‌كه كۆنتڕۆڵ بكرێت.
کۆمێنت (0)
تا ئێستا هیچ کۆمێنتێک نەکراوە.