سەرۆكی حكومەتی هەرێمی كوردستان پێشوازی لە باڵیۆزی یەكێتیی ئەوروپا لە عێراق دەكات

ئەمڕۆ سێشەممە 13ی دیسێمبەر، مەسرور بارزانی ،سەرۆكی حكومەتی هەرێمی كوردستان، پێشوازی لە ڤیللە ڤاریۆلا باڵیۆزی یەكێتیی ئەوروپا لە عێراق كرد .
لە دیدارەكەدا كە تۆركیلد بیوك بەرپرسی نوێی نووسینگەی یەكێتیی ئەوروپا لە هەرێمی كوردستان ئامادەی بوو ، سەرۆكی حكومەت پیرۆزبایی دەستبەكاربوونی لێكرد و هیوای سەركەوتنی بۆ خواست.
تەوەرێكی سەرەكی كۆبوونەوەكە، تایبەت بوو بە پەرەپێدانی هاریكاری و هاوئاهەنگیی لە نێوان هەرێمی كوردستان و یەكێتیی ئەوروپا، بە تایبەتی پشتیوانیكردنی چاكسازییەكانی كابینەی نۆیەم لە بواری هەمەجۆركردنی ئابووری و پشتگیریكردنی كەرتی كشتوكاڵ و دۆزینەوەی بازاڕی دەرەكی و هەناردەكردنی بەرووبوومی ناوخۆیی كوردستان بۆ بازاڕەكانی ئەوروپا، هەروەها باس لە گرنگیی چاكسازیكردن لە سیستەمی بانكی كوردستان و دەرفەتەكانی هاریكاریكردنی یەكێتیی ئەوروپا لەم بوارەدا كرا.
چارەسەركردنی كێشەكانی هەرێمی كوردستان و حكومەتی فیدراڵی لە سەر بنەمای دەستوور ، بەشێكی دیكەی گفتوگۆكانی كۆبوونەوەكە بوو. لەمبارەیەوە سەرۆكی حكومەت خواستی هەرێمی كوردستانی بۆ چارەسەركردنی كێشەكان دووپات كردەوە و ئاماژەی بەوە دا كە تەرخانكردنی شایستە داراییەكانی هەرێمی كوردستان لە بودجەی فیدراڵی بۆ ساڵی 2023 بە شێوەیەكی دادپەروەرانە و بە پێی ڕێژەی دانیشتووانی هەرێم و لە سەر بنەمای دەستوور، دەكرێ ببێتە دەستپێكێكی باش بە ئاراستەی چارەسەركردنی بنەڕەتی سەرجەم كێشەكانی نێوان هەرێمی كوردستان و حكومەتی فیدراڵی .