یانه‌ی هه‌ولێر پێنجه‌م سه‌ركه‌وتنی تۆمار كرد

ئه‌مڕۆ چوارشه‌م كوڕانی یانه‌ی هه‌ولێر له‌ یاریی تۆپی باله‌دا پێنجه‌م سه‌ركه‌وتنی له‌سه‌ریه‌كیان نووسییه‌وه‌ و هه‌نگاوێكی تر له‌ به‌ده‌ستهێنانی خولی نایابی تۆپی باله‌ی عێراق نزیكتر بوونه‌وه‌.

کاروانی سەرکەوتنەکانی تیپی تۆپی بالەی یانەی هه‌ولێر بەردەوامە و ئەمڕۆ لە شاری بەسڕا لە پێنجەم یاریی خۆیدا لە خولی نایابی عێراق، رووبەڕووی یانەی بەحری بوویەوە و توانی بە ئەنجامی سێ گێمی بێ بەرامبەر (25-22)، (25-15)، (25-20) سەرکەوتن بەدەست بهێنێت.

بەمشێوەیە كوڕانی یانه‌ی هه‌ولێر پێگەی خۆیان لە پێشەنگی گرووپی یەکەمی خولەکە بە کۆکردنەوەی (15) خاڵ قایمتر کرد.

بڕیاریشە یانه‌كه‌ سبەی پێنجشەم ڕێکەوتی 2022/12/15 لە شەشەم یاریی خۆیدا لە خولەکە کاتژمێر (4)ی ئێوارە ڕووبەڕووی یانەی (شوڕتە) ببێتەوە.