ریال مه‌درید به‌ فه‌رمی به‌هره‌مه‌ندێكی به‌ڕازیلی هێنایه‌ ڕیزی یانه‌كه‌یه‌وه‌

ئه‌مڕۆ پێنجشه‌م یانه‌ی ریال مه‌دریدی ئیسپانی به‌ فه‌رمی گرێبه‌ستكردنی له‌گه‌ڵ به‌هره‌مه‌ندێكی به‌رازیلی ڕاگه‌یاند.

به‌هره‌مه‌نده‌ به‌ڕازیلییه‌كه‌ ناوی ئه‌ندریكه‌ و ته‌مه‌نی 16 ساڵه‌ و ئێستا یاریزانی یانه‌ی پاڵمیڕاسی به‌ڕازیلییه‌.

ماڵپه‌ڕی یانه‌ی ریال مه‌درید ئاشكرای كرد: ڕێككه‌وتنمان له‌گه‌ڵ یانه‌ی پاڵمیراس و یاریزان ئه‌ندریك و ماڵباته‌كه‌ی كردووه بۆ هاوینی 2024 كاتێك ته‌مه‌نی پێگه‌یشتوو ده‌بێت (18 ساڵ) په‌یوه‌ندی به‌ یانه‌ی ریال مه‌دریده‌وه‌ بكات.

ڕاشیگه‌یاند: ئه‌ندریك تا ساڵی 2024 له‌ ڕیزی یانه‌ی پاڵمیراس و خولی به‌ڕازیل ده‌مێنێته‌وه‌.

ئاماژه‌ی به‌وه‌ش دا ئه‌ندریك له‌ چه‌ند رۆژی داهاتوودا ده‌گاته‌ پایته‌ختی ئیسپانیا و كاره‌كانی گرێبه‌سته‌كه‌ی له‌گه‌ڵ یانه‌ی شاهانه‌ ته‌واو ده‌كات.

جێی باسه‌ ئه‌ندرێك به‌هۆی ئه‌و ئاسته‌به‌رزه‌ی كه‌ له‌ ماوه‌ی ڕابردوودا له‌گه‌ڵ یانه‌ی پاڵمیڕاس پێشكه‌شی كردبوو، ببووه‌ جێی بایه‌خ و سه‌رنجی زۆرێك له‌ یانه‌ گه‌وره‌كانی ئه‌وروپا، به‌ڵام دواجار ئه‌و به‌هره‌مه‌نده‌ به‌ڕازیلییه‌ یانه‌ی ریال مه‌دریدی هه‌ڵبژارد بۆ ئه‌وه‌ی له‌ داهاتوودا یاریی بۆ بكات.