سەرۆک وەزیرانی عێراق ئەمڕۆ سێشەممە 20ـی 12ـی 2022 بەشداری لە کۆنگرەی بەغدا 2 لە ئوردن کرد و جەختی کردەوە کە دەستوەردان لە کاروباری ناوخۆیی و پێشێلکردنی سەروەری خاکی عێراق ڕەت دەکەنەوە.
محەمەد شیاع سوودانی، سەرۆکی ئەنجوومەنی وەزیران لە کۆنگرەی بەغدا 2 لە ئوردن کرد، ڕایگەیاند: حکوومەتەکەمان بەرنامەیەکی واڵاوکراو پەیڕەو دەکات کە بنیادنانی هاوبەشیگەلێکی هەرێمایەتی و نێودەوڵەتی لەخۆ دەگرێت، لەسەر بنەماکانی ڕەچاوکردنی بەرژەوەندییە هاوبەشەکان بنیادنرابێت، بێگومان لەگەڵ ئەنجامدانی پڕۆژەگەلێکی ستراتیژی هاوبەش و تەواوکار لەپێناو گرێدانی عێراق بە دەوروبەری هەرێمی خۆیەوە.
ڕاشیگەیاند: لەسەرئاستی نێوخۆیی، نەهێشتنی گەندەڵی دارایی و کارگێڕیمان لەپێشینەی کارەکانمان داناوە، بەشێوەیەکی کردەییش دەستمان بە هەڵمەتێک کردووە بۆ بەرەنگاربوونەوەی گەندەڵی، لە باڵاترین ئاستەکانەوە پڕۆسەکە ئەنجام دەدەین، داواش لە وڵاتانی دۆست دەکەین یارمەتیمان بدەن لە گێڕانەوەی پارەوپولی ڕەوانەکراو و پاتاڵکراوی عێراق و تۆمەتبارانیش ڕادەست بکرێنەوە کە لەو وڵاتانەدا نیشتەجێن.
سوودانی جەختی کردەوە کە "عێراق پابەندە بە بنیادنانی پەیوەندی هاوسەنگ لەگەڵ هەموو هاوبەشە هەرێمی و نێودەوڵەتییەکان، هەروەها خۆشی دەپارێزێت لە سەنگەرگرتن و دروستکردنی کێشە، سیاسەتی هێورکردنەوە و کەمکردنەوەی بارگرژی پەیڕەو دەکات، لە هەمانکاتیشدا دەستوەردان لە کاروباری نێوخۆیی و پێشێلکردنی سەروەری و دەستدرێژی سەرخاکی خۆی ڕەت دەکاتەوە."
سەرۆک وەزیرانی عێراق ئاماژەی بەوەش دا کە "پێویستە هەموومان کاری هاوبەشانە بکەین و هەماهەنگی یەکدی بکەین بۆ نەهێشنی تیرۆر بە هەموو شێوەکانییەوە، پێویستە میکانیزم و پلانی ڕاستەقینەش دابڕێژین بۆ شکستپێهێنانی خواستە چەپەڵەکانی تیرۆریستان کە لاوانمان بەکاردێنن بە هزروبیرە ڕووخێنەرەکانیان."
کۆمێنت (0)
تا ئێستا هیچ کۆمێنتێک نەکراوە.