به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی ئاشكرای كرد كه له‌م هه‌فته‌یه‌دا شه‌پۆڵێكی تری بارانبارین له هه‌رێمی كوردستان ده‌ست پێ ده‌كاته‌وه.
به‌شی پێشبینی كه‌شوهه‌وا له به‌ڕێوه‌به‌رایه‌تییه‌كه له ڕاپۆرتێكدا بڵاوی كرده‌وه: کاریگەری هەردوو نزمەپاڵەپەستۆى دەریای سوور و کەنداوى عەرەبی کار دەکاتە سەر بەشێک لە ناوچەکانى باشوورى عێراق و پاشان درێژ دەبێتەوە بۆ سەر بەشێک لە ئیدارەى گەرمیان و باشوورى پارێزگاى سلێمانی.
بڵاویشی كرده‌وه: لە کاتەکانى ئێوارەى ڕۆژى پێنجشەمی داهاتوو بە هۆى ئەم کاریگەرییەی كه‌شوهه‌وا، بارانبارین ڕوو لە بەشێک لە ئیدارەى گەرمیان و بەشێک لە پارێزگاى هەڵەبجە و ناوچەکانى باشوورى پارێزگاى سلێمانى دەکات بەشێوەى نمەباران وهەندێكجار بارانى مامناوەند لە ناوچەى جیاجیاكان دەبارێت.
ئاماژه‌شی دا: بارانبارینه‌كه لە سنوورى قەزاى خانەقین و مەندەلى و دەوروبەرى زیاتردەبێت و ته‌نانه‌ت هەندێكجار هەورەتریشقەشى لەگەڵ دەبێت.
له كۆتایی ڕاپۆرته‌كه‌دا به‌شی پێشبینی كه‌شوهه‌وای به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی ئاماژه‌ی به‌وه‌ش دا كه ئه‌م شه‌پۆڵه كورت مه‌ودایه و هه‌ر له هه‌مان ڕۆژ واته ڕۆژی پێنجشه‌م كاریگه‌رییه‌كه‌ی كۆتایی دێت.
کۆمێنت (0)
تا ئێستا هیچ کۆمێنتێک نەکراوە.