حاكمی ویلایه‌تی نیۆیۆڕك له ئه‌مه‌ریكا باری نائاسایی و له‌ناكاوی بۆ هه‌موو هه‌رێمه‌كه‌ی ڕاگه‌یاند وه‌ك ئاماده‌كارییه‌ك بۆ ئه‌و زریانه گه‌وره و مه‌ترسیداره‌ی كه پێشبینی ده‌كرێ ناوچه‌كه‌یان بگرێته‌وه.
كاتی هۆشۆڵ حاكمی ویلایه‌تی نیۆیۆڕك ڕایگه‌یاند: له كاتژمێر 6ی سه‌رله‌به‌یانی ئه‌مڕۆ هه‌ینی به‌كاتی ئه‌مه‌ریكا زریانی به‌تینی ئیلیووت ده‌گاته هه‌رێمی نیۆیۆڕك.
كاتی داواشی له سه‌رجه‌م دانیشتووانی نیۆیۆڕك كرد ئه‌وانه‌ی به‌نیازی گه‌شت و وه‌رگرتنی پشوون، با رۆژی هه‌ینی گه‌شته‌كانیان دوابخه‌ن و له ماڵه‌كانی خۆیان و شوێنه پارێزراوه‌كان به سه‌لامه‌تی بمێننه‌وه و به‌هیچ شێوه‌یه‌ك نه‌یه‌نه ده‌ره‌وه.
ئه‌م هۆشدارییه بۆ ئه‌وه دراوه كه بڕیاره سه‌رله‌به‌یانی ئه‌مڕۆ هه‌ینی به كاتی ئه‌مه‌ریكا زریانی ئیلیووت و سه‌رما و سۆڵه و به‌فربارینی به‌تین و هه‌روه‌ها لافاو له ته‌واوی ناوچه‌كانی نیۆیۆڕك دروست ببێت.
به‌هۆی ئه‌م زریانه‌وه تا ئێستا زیاتر له 5 هه‌زار گه‌شتی ئاسمانی و زه‌مینی له هه‌رێمی نیۆیۆڕك هه‌ڵوه‌شێنراوه‌ته‌وه.
كه‌شناسی ویلایه‌تی نیۆیۆڕك پێشبینی كردووه له‌گه‌ڵ دروستبوونی زریانه‌كه، كه‌شێكی سارد و به‌فراویش ڕوو له به‌شێكی فراوانی هه‌رێمه‌كه بكات و هه‌روه‌ها له ناوچه كاناراوه‌كانیش بارانی به‌لێزمه ببارێت و ببێته هۆی دروستبوونی به‌رزبوونه‌وه‌ی ئاو و لافاو.
کۆمێنت (0)
تا ئێستا هیچ کۆمێنتێک نەکراوە.