به‌ڕێوه‌به‌رایه‌تی گشتیی كاروباری مینی هه‌ولێر ئه‌مڕۆ دووشه‌م ئاشكرای كرد كه كێڵگه‌یه‌كی مه‌ترسیدار و پڕ له مینیان له گوندێكی سنووری شارۆچكه‌ی سیده‌كان دۆزیوه‌ته‌وه.
به‌ڕێوه‌به‌رایه‌تییه‌كه ڕایگه‌یاند: له‌لایه‌ن چاودێری سه‌لامه‌تی گوندی شیوان له سنووری شارۆچكه‌ی سیده‌كان ئاگاداركرانه‌وه له ده‌ركه‌وتنی ژماره‌یه‌ك مین له ناوچه‌كه‌یاندا.
ڕاشیگه‌یاند: ئه‌مڕۆ دووشه‌م تیمی كیو ئه‌ی گه‌یشته گوندی شیوان و دوای وه‌رگرتنی زانیاری له كه‌سانی شاره‌زا و بینینی ناوچه‌كه و هه‌ڵسه‌نگاندنه‌كانیان، ده‌ركه‌وت كه ناوچه‌یه‌كی مینڕێژكراو و مه‌ترسیداری مین له سنووری گونده‌كه هه‌یه.
به‌ڕێوه‌به‌رایه‌تی كاروباری مینی هه‌ولێر ئاماژه‌ی به‌وه‌ش دا كه هه‌ر ئه‌مساڵ له ناوچه‌كه چه‌ند مینێك ته‌قیوه‌ته‌وه و قوربانیشی لێ كه‌وتۆته‌وه.
جه‌ختیشی كرده‌وه كه بڕیاردرا هه‌ر دوای ته‌واوبوونی پشووه‌كان و ئاسایی بوونه‌وه‌ی ده‌وامی فه‌رمی، كار بۆ نیشانه‌كردن و پاككردنه‌وه‌ی ناوچه‌كه له كێڵگه مینه‌كه بكرێ به‌مه‌به‌ستی پاراستن و سه‌لامه‌تی هاووڵاتییان.
کۆمێنت (0)
تا ئێستا هیچ کۆمێنتێک نەکراوە.