له‌ڕووی پزیشكییه‌وه هه‌ڵوه‌رینی رۆژانه‌ی 50 تا 100 تاڵه‌مووی قژ شتێكی ئاسایی و نۆڕماڵه، به‌ڵام زیاتر له‌مه به نه‌خۆشی داده‌نرێت و پێویسته به زووترین كات چاره‌سه‌ر بكرێت.
ملیۆنان پیاو و ئافره‌ت ئێستا له جیهان كێشه‌ی هه‌ڵوه‌رینی قژیان هه‌یه و به‌دوای چاره‌سه‌رێك ده‌گه‌ڕێن بۆ ڕاوه‌ستانی هه‌ڵوه‌رینی قژیان.
دكتۆر نووشین چۆدری كه پزیشكێكی پسپۆڕی پێسته و ماوه‌ی چه‌ندین ساڵه تۆژینه‌وه له‌سه‌ر هۆكاره‌كانی هه‌ڵوه‌رینی قژ ده‌كات، چه‌ند ئامۆژگارییه‌كی ئه‌و كه‌سانه ده‌كات كه كێشه‌ی هه‌ڵوه‌رینی قژیان هه‌یه كه بریتین له‌مانه‌ی خواره‌وه:-
چه‌ندجار شۆرینی قژ له هه‌فته‌یه‌كدا
دكتۆر چۆدری سه‌باره‌ت به سه‌ر و قژ شۆرین له هه‌فته‌یه‌كدا ده‌ڵێت: باشتره هه‌موو كه‌س هه‌فتانه دوو یان سێ جار قژیان بشۆرن، ئه‌وانه‌شی كه به‌شێوه‌یه‌كی گشتی قژیان وشك یاخود لووله، ده‌كرێت كه‌مێك له‌م ڕێژه‌یه هه‌فتانه قژیان بشۆرن.
هه‌روه‌ها ده‌ڵێت: ئه‌گه‌ر له هه‌فته‌یه‌كدا كه‌متر له‌و دوو ڕێژه‌یه‌ی سه‌ره‌وه قژ بشۆرێت، ئه‌وا ده‌بێته هۆكاری چه‌وربوون و پیسبوونی قژ كه ئه‌مه‌ش داخستنی كونیلكه‌كانی پێستی سه‌ری لێ ده‌كه‌وێته‌وه، ئه‌مه‌ش ڕێگه خۆش ده‌كات بۆ هه‌ڵوه‌رینی زیاتری قژ.
ئه‌و ده‌ڵێت: پاكڕاگرتنی پێستی سه‌ر گرینگترین كاره كه هاووڵاتییان ئه‌نجامی بده‌ن تا كونیلكه‌كانی سه‌ر به‌هۆی چه‌ورییه‌وه نه‌گیرێن و به‌هۆیه‌وه ببێته هۆی زیادبوونی هه‌ڵوه‌رینی قژ.
ئاماژه به‌وه‌ش ده‌كات: زیاده‌ڕه‌وی و شۆردنی چه‌ندجاره‌ی رۆژانه‌ی قژ، به‌هه‌مانشێوه زیانبه‌خشه و ده‌بێته هۆی زیادبوونی هه‌ڵوه‌رینی قژ.
هه‌روه‌ها داواش ده‌كات كه خۆ به‌دووربگرن له به‌كارهێنانی ئامێری وشككردنه‌وه‌ی كاره‌بایی (مجه‌فه) كه ڕاسته‌وخۆ زیانێكی گه‌وره به پێستی سه‌ر و قژ ده‌گه‌یه‌نێ و هۆكارێكه بۆ زیادبوونی هه‌ڵوه‌رینی قژ.
دكتۆر نووشین چۆدری هه‌روه‌ها چه‌ند هۆكارێكی تریش دیاری ده‌كات كه به‌شێوه‌ی راسته‌وخۆ و ناڕاسته‌وخۆ ده‌بنه هۆكار بۆ هه‌ڵوه‌رینی زیاتری قژ، ئه‌وانیش بریتین له:-
- زۆر ڕه‌نگكردنی قژ
- به‌كارهێنانی ئاوی گه‌رم له كاتی سه‌رشۆریندا
- شێوازی ناته‌ندروستی داهێنانی قژ
- به‌كارهێنانی ئامێر بۆ ڕاكێشانی قژ
- زۆر به‌ركه‌وتنی خۆر
- نه‌شۆرنی قژ بۆ ماوه‌یه‌كی زۆر
- نه‌خۆشییه‌كانی پێستی سه‌ر وه‌ك هه‌وكردن و خوران
- خراپ مامه‌ڵه‌كردن له‌گه‌ڵ قژی ته‌ڕ
- ناڕێكی له خواردنی ژه‌مه‌كان و كه‌می مادده خۆراكییه سه‌ره‌كی و پێویستییه‌كان
کۆمێنت (0)
تا ئێستا هیچ کۆمێنتێک نەکراوە.