بەشی رۆشنبیری و راگەیاندنی مەکتەبی سیاسیی پارتی دیموکراتی کوردستان ئه‌مڕۆ چوارشه‌م پرسەنامەیەکی بۆ کۆچی دوایی نووسەر و رووناکبیر پڕۆفیسۆر (د. ئازاد عوبێد) بڵاو کردەوە.
ئه‌مه‌ی خواره‌وه ده‌قی پرسه‌نامه‌كه‌ی مەکتەبی سیاسیی پارتی دیموكراتی كوردستانه:-
بەڕێزان خانەوادەی نووسەر و مامۆستای زانکۆ (د. ئازاد عوبێد)
بە داخ و پەژارەیەکی زۆرەوە هەواڵی کۆچی دوایی مامۆستا و مێژوونووسی گەلەکەمان (د.ئازاد عوبێد)مان بیست، بەو بۆنە خەمناکەوە پرسە و سەرەخۆشی خۆمان ئاڕاستەی ئێوەی بەڕێز و کەسوکار و بنەماڵەکەتان دەکەین.
مامۆستا (د.ئازاد عوبێد) کەسایەتیەکی نیشتیمانپەروەر و مامۆستایەکی ئەکادیمی و نووسەرێکی بەتوانا و لێهاتوو بوو، بە بەرهەمەکانی خزمەتێکی زۆری مێژوو و زمان و رۆژنامەوانیی کوردیمانی کردووە.
مامۆستا (د.ئازاد عوبێد) لە رێگەی بەرهەمە مێژوویی و رۆشنبیری و زانستییەکانی گەنجینەیەکی گرنگ و دەوڵەمەندی بۆ بەجێهێشتووین کە مایەی شانازییە بۆ بزووتنەوەی رۆشنبیری و ئەدەبی و زمانەوانیمان، بۆیە بە دواماڵئاوایی و بە لەدەستدانی (د.ئازاد عوبێد)درزێکی دیار و بەرچاو دەکەوێتە ناوەندە رۆشنبیری و ئەدەبییەکان و کتێبخانەی کوردی.
هیوادارین هاوسۆزی و هاوخەمی نووسەران و قوتابیان و خوێنەرانی بەرهەمەکانی خوالێخۆشبوو ببێتە مایەی سەبووری و ئارامگرتنتان و لە خەم و خەفەتتان کەم بکاتەوە.
جارێکی دیکە پرسە و سەرەخۆشی خۆمان دووبارە دەکەینەوە و، داواکارین لە خوای گەورە خوالێخۆشبوو بە بەهەشتی بەرین شاد بکات و ئێوەش لە خەم و خەفەت و کۆستی دیکە بەدوور بن.
بەشی رۆشنبیری و راگەیاندنی مەکتەبی سیاسی
پارتی دیموکراتی کوردستان
28ـی 12ـی 2022
کۆمێنت (0)
تا ئێستا هیچ کۆمێنتێک نەکراوە.