پڕۆژەیەکی گرنگ لە سنووری ئیدارەی ڕاپەڕین جێبەجێ دەکرێت

حکوومەتی هەرێمی کوردستان لە سنووری ئیدارەی ڕاپەڕین پڕۆژەی پردی دەربەندی ڕانیە جێبەجێ دەکات کە بە گرنگترین پڕۆژەی ستراتیژی لە سنووری ئیدارەی سەربەخۆی ڕاپەڕین دادەنرێت.

فەرمانگەی میدیا و زانیاری حکوومەتی هەرێمی کوردستان ڕایگەیاند: هەوڵەکانی کابینەی نۆیەمی حکوومەتی هەرێمی کوردستان، بۆ بونیادنانی ژێرخانێکی بەهێزیی ئابووری بۆ هەرێمی کوردستان بەردەوامن و لەو چوارچێوەیەشدا، گرنگترین پڕۆژەی ستراتیژیی لە سنووری ئیدارەی سەربەخۆی ڕاپەڕین، جێبەجێ دەکرێت.

ڕاشیگەیاند: پڕۆژەی پردی دەربەندی ڕانیە، کە ئیدارەی ڕاپەڕین بە پارێزگای سلێمانی دەبەستێتەوە، دەبێتە درێژترین پردی ناوچەکە و لە ماوەی شەش بۆ هەشت مانگدا، تەواو دەکرێت.

هیوا عەبدوڵڵا، ئەندازیاری پرۆژەی دەربەندی ڕانیە، لەبارەی گرنگیی پڕۆژەکە، باسی لەوە کرد کە "پڕۆژەکە، یەکێکە لە پڕۆژە بەردەوام و ستراتیژییەکانی حکوومەت لە سنووری ئیدارەی ڕاپەڕین، ئەویش بە خاسیەتی ئەوەی یەکەمجارە کە پرۆژەیەکی هاوشێوە لە ناوچەکە جێبەجێ دەکرێت."

سەبارەت بە کارکردن و ماوەی تەواوبوونی پڕۆژەکە، هیوا عەبدوڵڵا باسی لەوەش کرد کە ''لەدوای وەستانی پڕۆژەکە بۆ ماوەیەک، حکوومەتی هەرێمی کوردستان بڕەپارەیەکی بۆ تەواوکردنی پڕۆژەکە تەرخان کرد و بەمەش کارکردن لە پرۆژەکە دەستی پێ کردەوە، ئەگەر تووشی قەیرانی دارایی نەبینەوە، لەماوەی شەش بۆ هەشت مانگدا، پڕۆژەکە تەواو دەکرێت و دەخرێتە خزمەت شوفێران و هاووڵاتییان."

فەرمانگەی میدیا و زانیاری ئاماژەی بەوە داوە کە "تاوەکو ئێستا 60%ـی پڕۆژەی پردی دەربەندی ڕانیە تەواو بووە و کارکردنیش بۆ تەواوکردنی پڕۆژەکە لەکاتی خۆیدا، بەردەوامە.

هیمداد ئەحمەد، سەرپەرشتیاری پڕۆژەی پردی دەربەندی ڕانیە، لەبارەی پێکهاتەی پڕۆژەکەوە گوتی: درێژیی پردەکە 408 مەترە و بەرزییەکەشی 21 مەترە. لە دوو ئاراستەی چوون و هاتن پێکهاتووە کە پانیی هەر ئاراستەیەک 5 مەتر و نیوە، ئەمە جگە لەوەی پایەڵەکانی پردەکە 12 مەتر لەژێر زەوییەوەن."

فەرمانگەی میدیا و زانیاری سەبارەت بە گوژمەی پڕۆژەکە ئاماژەی بەوە داوە کە "گوژمەی دروستکردنی پردی دەربەندی ڕانیە، 12 ملیار و 416 ملیۆن دینارە و پێشتر لەلایەن مەسرور بارزانی، سەرۆکی حکوومەتی هەرێمی کوردستانەوە، بەردی بناغەکەی دانراوە.