بەهۆی لێچوونی غازەوە ئەمڕۆ هەینی 30ـی 12ـی 2022 لە خواردنگەیەکی پارێزگای ئایدن لە تورکیا تەقینەوە ڕووی دا، بەهۆیەوە 7 کەس گیانی لەدەست دا کە 3ـیان منداڵن.
حوسێن ئاکسۆی پارێزگاری ئایدن ڕایگەیاند: تەقینەوەکە لە خواردنگەیەک ڕووی داوە لە کاتێکدا کە کرێکارەکان خەریکی گۆڕینی یەکێک لەو بوتڵە غازانە بوون بۆ کارپێکردنی سۆپا.
بەپێی هەواڵی میدیا ناوخۆییەکانی تورکیا، 7 کەس بەهۆی تەقینی بوتڵە غازەکەوە گیانیان لەدەست داوە و چوار کەسی دیکەش گەیەنراونە نەخۆشخانە.
میدیاکانی تورکیا ئاماژە بەوە دەدەن کە ئۆتۆمبێلەکانی فریاکەوتن و تیمەکانی بەرگری شارستانی چوونەتە شوێنەکە، دوو لە بریندارەکان بەهۆی خۆهەڵدانیان لە نهۆمی دووەمی پەنجەرەی ئەو خواردنگەیەوە برینداربوونە، بۆ ڕزگاربوونیان لە ئاگرەکە.
کۆمێنت (0)
تا ئێستا هیچ کۆمێنتێک نەکراوە.