یاریدەدەری مه‌سرور بارزانی سەرۆکی حکوومەتی ھەرێمی کوردستان، رێباز حەملان رایگەیاند، رێكکەوتنی نێوان هەولێر و بەغدا ھەنگاوی ئەرێنی و پەرەسەندووی دەبێت، بەتایبەت ئەگەرێکی زۆرە پشکی ھەرێم لە بوودجەی ساڵی دارایی ٢٠٢٣ ی عێراق لە سەدا ١٢،٦٧ ببێتە لەسەدا ١٤ لەگەڵ چارەسەری دۆسییە ھەڵپەسێردراوەکانی دیکە بەپێی دەستوور.
رێباز حەملان لە پەیامێکدا کە بەبۆنەی ھاتنی ساڵی نوێی ٢٠٢٣ی زایینی بڵاوی کردووەتەوە، رایگەیاندووە حکوومەتی ھەرێمی کوردستان پابەند و پێداگر و بەردەوامە لەسەر جێبەجێکردنی کارنامەو بەرنامەکانی کابینەی نۆیەم.
یاریدەدەری سەرۆکی حکوومەتی ھەرێمی کوردستان راشیگەیاندووە: "ئەگەر ئاڵنگاری و فاکتەری دەرەکی نەبێتە ھۆی دواکەتنیان ئەوا لە ساڵی نوێ گەشبینم بەوەی کە لە بواری بەرھەمھێنانی نەوت و گازی سرووشتی پێدەنێتە قۆناغێکی پێشکەوتووتر بۆ داھاتویەکی باشتر و ھەناردەکردنی نەوت بەردەوام دەبێت".
رێباز حەملان ئاماژەی بەوەشکردووە کە لە بواری دارایی رێکخستنەوە و چاکسازیکردن لە کۆکردنەوەی داھاتەکانی ناوخۆ لە باج و گومرگ و رسوماتی ناوخۆ دەبنە ھۆی زیادبوونی داھاتە نانەوتییەکان و کەرتی بانکی دەبێتە دامەزراوەیەکی نێودەوڵەتیی و سیستماتیک.
یاریدەدەری سەرۆکی حکوومەتی ھەرێمی کوردستان لەبارەی رێكکەوتنی نێوان هەولێر و بەغدا لەسەر پرسی بوودجە رایگەیاندووە "رێکەوتنی ھەرێم و بەغداد ھەنگاوی ئەرێنی و پەرەسەندووی دەبێت، بەتایبەت ئەگەرێکی زۆرە پشکی ھەرێم لە بوودجەی ٢٠٢٣ ی عێراق لە سەدا ١٢،٦٧ ببێتە لە سەدا ١٤ لەگەڵ چارەسەری دۆسییە ھەڵپەسێردراوەکانی دیکە بەپێی دەستوور".
رێباز حەملان ئاماژەی بەوەشداوە کە مووچەی مووچەخۆران بەردەوام لە کاتی خۆی دەبێتە بوژانەوەی باری دارایی و ئابووری ھەرێم و جوڵەیەکی بەرچاوی دەبێت لە بازاڕ و جموجۆڵی بازرگانی.
یاریدەدەری مةسرور بارزاني سەرۆکی حکوومەتی ھەرێمی کوردستان لە کۆتایی پەیامەکەیدا رایگەیاندووە "ئەو ھەنگاوە ئەرێنیانەی کە دەنرێت بۆ تەبایی لایەنە سیاسیییەکان، ئەم ھەرێمە پێگەیەکی کاریگەر و ستراتیژی ھەیە لە رووی سیاسی و ئابووری و جیوگرافی و فەرھەنگی پێکەوەژیانی ھەموو پێکھاتە و ئایینەکانی تێدا کۆبوونەتەوە و لە رووی پەیوەندییە نێودەوڵەتیییەکان دەچێتە ئاستێکی گەشەسەندوو تر".
کۆمێنت (0)
تا ئێستا هیچ کۆمێنتێک نەکراوە.