سەرۆکی حکوومەتی هەرێمی کوردستان ئەمڕۆ دووشممە 02ـی 01ـی 2023 بڕیاری نزیکەی 2 ملیار دینار بۆ کەمکردنەوەی زیانەکانی لافاو لە هەولێر تەرخان کرد.
فەرمانگەی میدیا و زانیاری حکوومەتی هەرێمی کوردستان ڕایگەیاند: لە چوارچێوەی گرنگیدانی کابینەی نۆیەمی حکوومەتی ھەرێمی کوردستان، بۆ خزمەتکردنی ھاووڵاتییانی ھەرێمی کوردستان و بە ڕەچاوکردنی بەرژەوەندیی گشتی، مەسرور بارزانی، سەرۆکی حکوومەتی هەرێمی کوردستان، ڕەزامەندی لەسەر تەرخانکردنی گوژمەی ملیارێک و 985 ملیۆن دینار دا، بە مەبەستی کەمکردنەوەی کاریگەریی لافاو لە گوندی گردجووتیار لە نزیک شاری هەولێر.
ڕاشیگەیاند: ئەم گوژمەیە بە شێوەی نەختینە و بە قۆناغ لەسەر بودجەی وەبەرھێنانی وەزارەتی کشتوکاڵ و سەرچاوەکانی ئاو جێبەجێ دەکرێت.
فەرمانگەی میدیا و زانیاری جەختی کردۆتەوە کە "ڕێگریكردن لە لافاو و كەمكردنەوەی زیانەكانی لە شارە جیاجیاكانی كوردستاندا یەكێكە لە كارە سەرەكییەكانی حكوومەتی هەرێمی كوردستان، بۆ ئەم مەبەستەش ڕێوشوێنی جیاجیا دەگیرێنەبەر."
کۆمێنت (0)
تا ئێستا هیچ کۆمێنتێک نەکراوە.