وه‌زاره‌تی بازرگانی عێراق جه‌ختی كرده‌وه كه پابه‌ندن به بڕیاری زیادكردنی هه‌ندێ له مادده خۆراكییه‌كان له به‌شه‌خۆراكی مانگانه‌ی هاووڵاتییان له‌مساڵدا.
وه‌زاره‌ته‌كه له به‌یاننامه‌یه‌كدا ڕایگه‌یاند: پارساڵ توانیمان 11 سه‌به‌ته‌ی خۆراكی له به‌شه‌خۆراكی مانگانه‌ی هاووڵاتییان دابه‌ش بكه‌ین و بۆ ساڵی 2023 به‌هه‌مانشێوه به‌رده‌وام ده‌بن له دابه‌شكردنی مادده خۆراكییه‌كان بۆ هاووڵاتییان.
ڕاشیگه‌یاند: بۆ ئه‌مساڵ به بڕیاری ئه‌نجوومه‌نی وه‌زیرانی عێراق چه‌ند مادده‌یه‌كی خۆراكی بۆ هه‌ندێك خێزان زیاد ده‌كرێن ئه‌وانه‌ی كه داهاتیان سنوورداره و یاسای چاودێری كۆمه‌ڵایه‌تی ده‌یانگرێته‌وه.
مادده زیادكراوه‌كانیش بۆ هه‌ر هاووڵاتییه‌ك بریتی ده‌بن له: شیر بۆ گه‌وران 200 گرام، چایه 250 گرام، ئاردی سفر 1 كگم، هه‌روه‌ها مادده‌كانی زه‌یت 1 لیتر و شه‌كر 1 كگم زیاد ده‌كرێن.
جه‌ختیشی كرده‌وه كه ئه‌و ماددانه‌ی تا ئێستا دابه‌شكراون بۆ هه‌ر هاووڵاتییه‌ك بریتین له: شه‌كر 1 كگم، رۆنی زه‌یت 1 لیتر، برنج 3 كگم، شه‌كر 1 كگم، ئاوه‌ته‌ماته 400 گرام، نیسك 500 گرام و ئارینۆك 500 گرام.
له كۆتاییدا دڵنیایی دایه هاووڵاتییان كه كۆگاكانی سه‌ر به وه‌زاره‌تی بازرگانی بۆ چه‌ند مانگێك به‌شی ئازووخه‌ی دابه‌شكردنی تێدایه و هه‌موو هه‌وڵێكیش ده‌ده‌ن كه ئه‌و ماددانه‌ی دابه‌شی ده‌كه‌ن كوالێتییه‌كی باشی هه‌بێت.
کۆمێنت (0)
تا ئێستا هیچ کۆمێنتێک نەکراوە.