ئێواره‌ی ئه‌مڕۆ پێنجشه‌م له شاری مووسڵ باڵه‌خانه‌یه‌كی سێ نهۆمی ڕووخا و به‌هۆیه‌وه تا ئێستا 2 كه‌س گیانیان له‌ده‌ستداوه و پێشبینش ده‌كرێ چه‌ند كه‌سێكی تریش له‌ژێر پاشماوه‌ی باڵه‌خانه‌كه‌دا مابن و گیریان خواردبێت.
عه‌زیز ئه‌حمه‌د په‌یامنێری (كوردستان تیڤی) پێی ڕاگه‌یاندین: باڵه‌خانه سێ نهۆمییه‌كه ئێواره‌ی ئه‌مڕۆ پێنجشه‌م له ناوچه‌ی یارمچه له به‌شی چه‌پی شاری مووسڵ ڕووخاوه.
ڕاشیگه‌یاند: تیمه‌كانی به‌رگریی شارستانی مووسڵ هه‌رزوو گه‌یشتنه شوێنی ڕووداوه‌كه و توانیان 9 كه‌س له‌ژێر باڵه‌خانه‌كه ڕزگار بكه‌ن.
هه‌روه‌ها ڕایگه‌یاند: به‌گوێره‌ی زانیاری تیمه‌كانی به‌رگریی شارستانی مووسڵ گومان ده‌كرێت زیاتر له 6 كه‌سی تر له‌ژێر باڵه‌خانه‌كه‌دا مابن و گیریان خواردبێت، بۆیه ئه‌وان ئێستا خه‌ریكی گه‌ڕانن به دوایاندا.
په‌یامنێری كوردستان تیڤی ئاماژه‌ی به‌وه‌ش دا: تیمه‌كانی به‌رگریی شارستانی هه‌ر زوو ته‌رمی كه‌سێكیان له‌ژێر باڵه‌خانه‌كه ده‌رهێنا، هه‌روه‌ها 8 كه‌سی تریشیان به برینداری له ژێر دار و به‌ردی داڕماوی باڵه‌خانه‌كه ده‌رهێنا، دوای گواستنه‌وه‌شیان بۆ نه‌خۆشخانه، به‌هۆی سه‌ختی برینه‌كه‌یه‌وه یه‌كێك له برینداره‌كان گیانی له‌ده‌ست دا.
جه‌ختیشی كرده‌وه كه پارێزگاری نه‌ینه‌وا و به‌شێكی زۆری به‌رپرسانی شاری مووسڵ و ژماره‌یه‌كی زۆری تیمه‌كانی ڕزگاركردن و به‌رگریی شارستانی له شوێنی ڕووداوه‌كه‌ن.
کۆمێنت (0)
تا ئێستا هیچ کۆمێنتێک نەکراوە.