موقته‌دا سه‌در ڕێبه‌ری ڕه‌وتی سه‌در تویتێكی له‌سه‌ر به‌ڕێوه‌چوونی یارییه‌كانی جامی كه‌نداوی 25 بڵاو كرده‌وه كه بڕیاره سبه‌ی هه‌ینی له شاری به‌سڕا ده‌ست پێ بكات و تێیدا داوای له سه‌رپه‌رشتیارانی پاڵه‌وانیه‌تییه‌كه كرد به‌تایبه‌ت له یارییه‌كانی هه‌ڵبژارده‌ی عێراق هانده‌ران بێ به‌رامبه‌ر یاخود به پاره‌یه‌كی كه‌م بخه‌نه ژووره‌وه.
موقته‌دا سه‌در له تویته‌كه‌دا به‌خێرهاتنی سه‌رجه‌م میوانانی جامی كه‌نداوی كرد و داواشی له هاووڵاتییانی عێراقی به‌تایبه‌تیش خه‌ڵكی شاری به‌سڕا كرد له ماڵه‌كانیان مێوانداری مێوانان بكه‌ن هه‌روه‌ك ئه‌وه‌ی كه خه‌ڵكی به مێواندار و خانه‌خۆیی ناسراوه.
داواشی له لایه‌نه‌كان كرد ناكۆكی و جیاوازییه‌كان به‌لاوه بنێن و له گه‌نده‌ڵیش به‌دوور بكه‌ونه‌وه كه زیان به ناو و ناوبانگی عێراق و عێراقییه‌كان ده‌گه‌یه‌نێت.
هه‌روه‌ها داوای له سه‌رپه‌رشتیارانی پاڵه‌وانیه‌تییه‌كه كرد بارودۆخی جه‌ماوه‌ری تۆپی پێی عێراق به‌هه‌ند وه‌ربگرن و به‌تایبه‌تیش له یارییه‌كانی هه‌ڵبژارده‌ی عێراق هه‌وڵ بده‌ن بێ به‌رامبه‌ر یاخود بڕه پاره‌یه‌كی كه‌م بیانخه‌نه ناو یاریگه‌وه.
سبه‌ی شه‌و به فه‌رمی ڕكابه‌رییه‌كانی جامی كه‌نداوی 25 له شاری به‌سڕا ده‌ستپێده‌كات و له یه‌كه‌م یاریشدا كاتژمێر 7 هه‌ڵبژارده‌ی عێراق له‌نێو یاریگه‌ی نێوده‌وڵه‌تی به‌سڕا ڕووبه‌ڕووی هه‌ڵبژارده‌ی عومان ده‌بێته‌وه.
کۆمێنت (0)
تا ئێستا هیچ کۆمێنتێک نەکراوە.