ئه‌مڕۆ یه‌كشه‌م له پارێزگای هه‌ولێر كۆبوونه‌وه‌یه‌ك له‌باره‌ی پلان و پڕۆژه خزمه‌تگوزارییه‌كانی ساڵی 2023 كرا و له‌مباره‌یه‌وه چه‌ند پڕۆژه‌یه‌ك بڕیاری له‌سه‌ر درا.
ئێوارەی ئەمڕۆ یەکشەم بە سەرپەرشتی ئومێد خۆشناو پارێزگاری هەولێر کۆبوونەوەی شارەوانییەکان ئەنجامدرا.
لە کۆبوونەوەکەدا پارێزگاری هەولێر دوای ئەوەی خاڵی سەرەکی کۆبوونەوەی خستەڕوو، دەستخۆشی لە سەرۆکایەتی شارەوانی هەولێر و سەرجەم بەڕێوەبەرایەتی شارەوانییەکان کرد بۆ ئەنجامدانی پڕۆژە خزمەتگوزارییەکانی ساڵی ڕابردوو، کە لە چوارچێوەی بودجەی پەرەپێدانی پارێزگا و لە سەر داهاتی 15%ی سەرۆکایەتی شارەوانی، کاری باش کرا و پڕۆژەی خزمەتگوزاریی زۆر باش پێشکەش بە هاووڵاتییان کرا لە سنووری سەرجەم شارەوانییەکان.
پاشان گفتوگۆی لەبارەی پلان و پڕۆژە خزمەتگوزارییەکانی ئەمساڵ 2023 و پێداچوونەوە بە ئامادەکارییەکان کرا و لەوبارەیەوە بڕیاری پێویست وەرگیرا.
لە تەوەرێکی تری کۆبوونەوەکە باس لە پەرەپێدان و باشترکردن و ڕێکخستنەوەی شەقامەکانی شار و بازاڕ و بازاڕە میلـلییەکان بە گشتی کرا و تیشک خرایە سەر ڕێکخستنەوەی شوستەکان و ئەو شوێن و شەقامانەی کە لە چەند شوێنێکی شاری هەولێر قەرەباڵغی زۆریان کەوتۆتەسەر، ئەمە وێڕای تەئکیدکردنەوە لە بەردەوامیەدان بەهەڵمەتی ڕێگەنەدان بە ئەنجامدانی سەرپێچی و هەڵگرتنی زێدەڕۆییەکان.
لە کۆتاییدا لەلایەن ئامادەبووانەوە دوای خستەڕووی ڕا و سەرنج و تێبینی لەبارەی چەند پرسێکی گرینگی پەیوەست بە خزمەتکردنی هاووڵاتییان و گەیاندنی خزمەتگوزاریی پێویست لەلایەن شارەوانییەکانی هەولێر، تەئکید لە دەستکردنەوە بە جێبەجێکردنی پڕۆژە خزمەتگوزارییەکان بە شێوەیەکی یەکسان و بەبێ جیاوازی بۆ ئەمساڵ 2023 کرایەوە.
کۆمێنت (0)
تا ئێستا هیچ کۆمێنتێک نەکراوە.