بایەکی سارد و وشک هەرێمی کوردستان دەگرێتەوە؛ کەشوهەوا ساردتر دەبێت

شارەزایەکی کەشناسی ڕایگەیاند، سبەی سێشەممە 10ـی 01ـی 2023 بایەکی سارد و وشک هەرێمی کوردستان دەگرێتەوە، کەشوهەوا ساردتر دەبێت.

ئاراس جەبار، شارەزای کەشناسی ڕایگەیاند: لە ئەنجامی کاریگەری بەرزەپاڵەپەستۆیەک لەسەرناوچەکانمان، ئاسمانی ھەرێمی کوردستان بەزۆری ساماڵ دەبێت و لە  کاتەکانی بەرەبەیانی سبەیەوە لە ناوچەکانی سنووری ڕۆژھەڵاتی ھەرێمی کوردستان، پارێزگای سلێمانی، ئیدارەی ڕاپەرین و ناوچە شاخاوییەکان، خێرایی با بەشێوەی وشکەسەرما لە ئاراستەی باکوری ڕۆژھەڵاتەوە چالاک دەبێت بەخێرایی 15 تا 30 کیلۆمەتر لە کاتژمێرێک.

ڕاشیگەیاند: بەرزترین پلەکانی گەرما بەشێوەیەکی جێگیر دەمێنێتەوە و نزمترین پلەکانی گەرما لەشەودا نزمبوونەوەی زیاتر بەخۆیەوە ئەبینێت و لە سەرجەم ناوچە شاخاوییەکاندا 3 تاوەکو 5 پلە بۆ ژێر سفری سەدی نزم دەبنەوە و بەستن ڕوو دەدات، لە سەنتەری شاری سلێمانیش بۆ سفر پلە و پلەیەک ژێر سفر دائەبەزێت.

ئەو شارەزایەی کەشناسی ئاماژەی بەوەش دا کە کاریگەری ئەم وشکە سەرما و بایە لە ناوچەکانی ڕۆژھەڵاتی ھەرێمی کوردستان تاوەکو پێشنیوەرۆی ڕۆژی پێنجشەمە بەردەوامی دەبێت.