سەرۆکی ئەنجوومەنی نوێنەرانی عێراق لە میانی کۆبوونەوەی لەگەڵ سەرۆکی حکوومەتی هەرێمی کوردستان جەختی کردەوە کە ئێستا دەرفەتێکی باش هەیە بۆ چارەسەرکردنی کێشەکانی نێوان هەرێمی کوردستان و حکوومەتی فیدراڵ.
ئەمڕۆ چوارشەممە 11ـی 01ـی 2023 لە درێژەی سەردانەکەی مەسرور بارزانی سەرۆکی حکوومەتی هەرێمی کوردستان بۆ بەغدا له‌گه‌ڵ محەمەد حەلبووسی سەرۆکی ئەنجوومەنی نوێنەرانی عێراق کۆبووەوە.
لە کۆبوونەوەکەدا، بارودۆخی گشتیی و دوایین پێشهات و گۆڕانکارییەکانی عێراق و چارەسەکردنی کێشەکانی هەرێمی کوردستان و حکوومەتی فیدراڵ تاوتوێ کرا.
محەمەد حەلبووسی ئاماژەی بەوە دا کە ئێستا دەرفەتێکی باش هەیە بۆ چارەسەرکردنی کێشەکانی نێوان هەرێمی کوردستان و حکومەتی فیدراڵ، بەتایبەتی کێشەکانی پەیوەندیدار بە پڕۆژەیاسای بودجەی فیدراڵ بۆ ساڵی 2023 و پڕۆژەیاسای نەوت و گازی فیدراڵ.
هەردوولا جەختیان لە گرنگیی چارەسەرکردنی کێشە هەڵپەسێردراوەکان بەتایبەتی مافە دەستوورییەکان و شایستە داراییەکانی هەرێمی کوردستان لە بودجەی فیدراڵی و ئامادەکردنی پڕۆژەیاسای نەوت و گازی فیدراڵ و جێبەجێکردنی ماددەی 140 و دەستەبەرکردنی مافە دەستوورییەکانی پێشمەرگە و جێبەجێکردنی ڕێککەوتننامەی شنگال کردەوە.
کۆمێنت (0)
تا ئێستا هیچ کۆمێنتێک نەکراوە.