كه‌شناسی: له‌ هه‌ندێ ناوچه‌ كڕێوه‌ و به‌فر ده‌بارێت

به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی هه‌رێمی كوردستان ره‌وشی كه‌شوهه‌وای 48 كاتژمێری داهاتووی شاره‌كانی بڵاو كرده‌وه‌ و ڕایگه‌یاند كه‌ له‌ هه‌ندێ ناوچه‌ كڕێوه‌ و به‌فر ده‌بارێت.

كه‌شناسی سه‌باره‌ت به‌ ڕه‌وشی كه‌شوهه‌وای ئه‌مڕۆ هه‌ینی شاره‌كان ڕایگه‌یاند: ئاسمان لەنێوان نیمچە هەور و هەوری تەواو دەبێت، لە هەندێک کات خێرایی با کەمێک چالاک دەبێت، هه‌روه‌ها پله‌كانی گه‌رماش نزمتر ده‌بێته‌وه‌ به‌راود به‌ دوێنێ پێنجشه‌م و كه‌شه‌كه‌ سارد ده‌بێت.

ڕاشیگه‌یاند: خێرایی با له‌سه‌رخۆ و مامناوه‌ند ده‌بێت و ئاراسته‌كه‌شی به‌ره‌و باشووری خۆرهه‌ڵات ده‌بێت، هه‌روه‌ها مه‌ودای بینینیش له‌نێوان 8-10 كم ده‌بێت.

سه‌باره‌ت به‌ ڕه‌وشی كه‌شوهه‌وای سبه‌ی شه‌مووی شاره‌كان، كه‌شناسی ڕایگه‌یاند: ئاسمان هەوری تەواو دەبێت لەگەڵ بارینی نمەباران لە هەندێک ناوچە بە تایبەت لە ناوچەکانی هەڵەبجە و سلێمانی و گەرمیان، هه‌روه‌ها لەناوچە شاخاوییە سنوورییەکانی باکوری رۆژهەڵاتیش ئەگەری بارینی کڕێوە و بەفرێکی کەم هەیه‌، پله‌كانی گارماش هێشتا نزمتر ده‌بنه‌وه‌ و 1 تا 2 پله‌ به‌ به‌راورد به‌ ئه‌مڕۆ هه‌ینی ساردتر ده‌بێت.

ئاماژه‌شی دا: ئاراسته‌ی با به‌ره‌و خۆرهه‌ڵات ده‌بێت و خێراییه‌كه‌شی له‌سه‌رخۆ و مامناوه‌ند ده‌بێت و هه‌روه‌ها مه‌ودای بینینیش نزمتر ده‌بێته‌وه‌ بۆ 7-9 كم.

كه‌شناسی پله‌كانی گه‌رمی پێشبینیكراوی شاره‌كانی به‌مشێوه‌ی خواره‌وه‌ دیاری كرد:

هەولێر: 12 پلەى سیلیزى

سلێمانی: 9 پلەى سیلیزى

دهۆک: 12 پلەى سیلیزى

کەرکووک: 14 پلەى سیلیزى

هەڵەبجە: 9 پلەى سیلیزى

زاخۆ: 12 پلەى سیلیزى

سۆران: 8 پلەى سیلیزى

گەرمیان: 15 پلەى سیلیزى