یەکێتیی ئەوروپا لەسێدارەدانی عەلی رەزا ئەکبەری سەرکۆنە کرد

یەکێتیی ئەورووپا لەسێدارەدانی هاووڵاتی ئێرانی-بەریتانی، عەلی رەزا ئەکبەری کە هاوکات جێگری پێشووی وەزیری بەرگریی ئێران بوو، بەتوندی سەرکۆنە کرد.

ئەنجوومەنی یەکێتیی ئەورووپادا لە راگەیەندراوێکدا جەختی لەوە کردەوە، بە توندترین شێوە لەسێدارەدانی ئەکبەری-یان سەرکۆنە کردووە و لە هەر بارودۆخێکدا دژ بە سزای لەسێدارەدان دەوەستن.

لە راگەیەندراوەکەدا هاوخەمی بۆ بنەماڵەی ئەکبەری خراوەتەڕوو و تێیدا هاتووە: لە سێدارەدانی هاووڵاتییەکی ئەورووپی نموونەیەکی تۆقێنەرە.

لە راگەیەندراوەکەدا هەروەها ئاماژە بەوە کراوە کە یەکێتیی ئەورووپا داوا لە ئێران کردووە کە سیاسەتێکی یەکگرتوو بە ئاراستەی دوورکەوتنەوە لە جێبەجێکردنی سزای سێدارەدان و هەڵوەشاندنەوەی سزای لەسێدارەدان پەیڕەو بکات.

دوێنێ یه‌ك شەممە، جێگری پێشووی وەزیری بەرگریی ئێران، عەلی رەزا ئەکبەری بەتۆمەتی سیخوڕیکردن بۆ بەرژەوەندی هەواڵگریی بەریتانیا لەلایەن ئێرانەوە لەسێدارە درا.