ئه‌مڕۆ هه‌ینی له سنووری پارێزگای كه‌ركووك له‌لایه‌ن هێزه ئه‌منییه‌كانی عێراقه‌وه توانرا دوو تیرۆریستی داعش بێته كوشتن و هه‌روه‌ها ده‌ستیش بگیرێ به‌سه‌ر ژماره‌یه‌ك بۆمپ و چه‌ك و كه‌لوپه‌لی چه‌كداره‌كان.
ده‌زگای دژه‌تیرۆری عێراق بڵاوی كرده‌وه: له ئۆپه‌ڕاسیۆنێكی هێزه ئه‌منییه‌كان و دژه‌تیرۆری عێراق له ناوچه‌ی زه‌غیتوون له زنجیره چیاكانی حه‌مڕین له سنووری شاری كه‌ركووك توانرا دوو تیرۆریستی داعش بێته كوشتن.
ئاماژه‌ی به‌وه‌ش دا كه توانراوه ده‌ستیش بگیرێت به‌سه‌ر ژماره‌یه‌ك چه‌كی سووك و مامناوه‌ند و بۆمبی چێنراو و كه‌لوپه‌لی چه‌كداره‌كانی داعش.
ئه‌مه له‌كاتێكدایه كه به‌ره‌به‌یانی دوێنێ پێنجشه‌م له‌سه‌ر ڕێگه‌ی حه‌واڵی – سلێمانی له سنووری پارێزگای كه‌ركووك، هێرشكرایه سه‌ر ده‌ورییه‌كی پۆلیس و له ئه‌نجامیشدا ئه‌فسه‌رێك و شۆفێره‌كه‌ی سه‌ر به پۆلیسی فریاكه‌وتن كوژران.
دوای ڕووداوه‌كه‌ش، ڕێكخراوی تیرۆریستی داعش به‌رپرسیاره‌تی هێرشه‌كه و كوشتنی هه‌ردوو ئه‌ندامه‌كه‌ی پۆلیسی فریاكه‌وتنی كه‌ركووكی له ئه‌ستۆ گرت.
کۆمێنت (0)
تا ئێستا هیچ کۆمێنتێک نەکراوە.