نیوه‌ڕۆى ئه‌مڕۆ یه‌كشه‌ممه 2023/1/22 نێچیرڤان بارزانى، سه‌رۆكى هه‌رێمى كوردستان پێشوازى له ئیریك شۆڤالیێ باڵیۆزى فه‌ره‌نسا و مارتین یێگه‌ر باڵیۆزى ئه‌ڵمانیا له عێراق و شاندى یاوه‌رانى كرد.
له كۆبوونه‌وه‌یه‌كدا په‌یوه‌ندییه‌كانى هه‌رێمى كوردستان له‌گه‌ڵ فه‌ره‌نسا و ئه‌ڵمانیا، دۆخى ناوخۆى هه‌رێمى كوردستان، دۆخى عێراق و كارنامه‌ى حكوومه‌تى فیدراڵى، په‌یوه‌ندییه‌كانى هه‌ولێر ـ به‌غدا و هه‌وڵه‌كانى چاره‌سه‌ركردنى كێشه‌كانى نێوانیان، پرسى وزه و توانا و پێگه‌ى هه‌رێمى كوردستان له‌م بواره‌دا، خرانه به‌ر باس و گفتوگۆ.
نێچیرڤان بارزانى و شاندى میوان هاوڕا بوون له‌سه‌ر گرنگیى پشتگیرى له حكوومه‌تى فیدراڵیى عێراق بۆ جێبه‌جێكردنى كارنامه‌كه‌ى به‌پێى ڕێككه‌وتنى پێكهێنانى حكوومه‌ت له‌نێوان لایه‌نه سیاسییه‌كاندا، هه‌روه‌ها جهختیان له گرنگیى یه‌كڕیزیى لایه‌نه سیاسییه‌كانى هه‌رێمى كوردستان كرده‌وه.
باڵیۆزانى ئه‌ڵمانیا و فه‌ره‌نسا پوخته‌یه‌كیان ده‌رباره‌ى پرۆژه‌ى بنیاتنانى په‌یمانگه‌ى داهاتووى كولتووریى هاوبه‌شى فه‌ره‌نسى ـ ئه‌ڵمانى له هه‌ولێر له یادى شه‌ست ساڵه‌ى په‌یمانى ئه‌لیزێى دۆستایه‌تیى فه‌ره‌نسا و ئه‌ڵمانیادا پێشكه‌ش كرد، هه‌روه‌ها جهختیان له خواستى وڵاته‌كانیان بۆ بره‌ودان به په‌یوه‌ندییه‌كانیان له‌گه‌ڵ هه‌رێمى كوردستان له هه‌موو بواره‌كاندا كرده‌وه، به‌تایبه‌تیش له بوارى كولتووریدا.
لاى خۆیه‌وه نێچیرڤان بارزانى، سوپاس و پێزانینى هه‌رێمى كوردستانى بۆ فه‌ره‌نسا و ئه‌ڵمانیا دووپات كرده‌وه بۆ یارمه‌تى و هاوكارییه‌كانیان له بوارى سیاسى، سه‌ربازى، ئابوورى، مرۆیى و كولتووریدا، هه‌روه‌ها وێڕاى خۆشحاڵى و ده‌ستخۆشى، دانانى به‌ردى بناغه‌ى په‌یمانگه‌ى داهاتووى كولتووریى هاوبه‌شى فه‌ره‌نسى ـ ئه‌ڵمانى له هه‌ولێر به هه‌نگاوێكى گرنگى بره‌ودان به په‌یوه‌ندییه كولتوورییه‌كانى فه‌ره‌نسا و ئه‌ڵمانیا له‌گه‌ڵ هه‌رێمى كوردستان له قه‌ڵه‌م دا.
په‌یوه‌ندییه‌كانى عێراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه، دوایین پێشهاته‌كانى ناوچه‌كه به‌گشتى و چه‌ند پرسێكى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه بوو.
کۆمێنت (0)
تا ئێستا هیچ کۆمێنتێک نەکراوە.