شانه‌ی ڕاگه‌یاندنی ئه‌منی عێراق ئه‌مڕۆ یه‌كشه‌م له‌ناوبردنی 5 تیرۆریستی داعشی له سنووری پارێزگای كه‌ركووك ڕاگه‌یاند له‌گه‌ڵ ده‌ستبه‌سه‌رداگرتنی كۆمه‌ڵێك چه‌ك و ته‌قه‌مه‌نی و كه‌لوپه‌لی لۆجیستی چه‌كداران.
شانه‌كه له به‌یاننامه‌یه‌كدا ڕایگه‌یاند: شه‌وی ڕابردوو فڕۆكه جه‌نگییه‌كانی عێراق تۆپبارانی چه‌ند شوێنێكی چه‌كدارانی داعشیان له باكوری رۆژهه‌ڵاتی شارۆچكه‌ی دووز له سنووری پارێزگای كه‌ركووك كرد.
ڕاشیگه‌یاند: به‌ره‌به‌یانی ئه‌مڕۆ یه‌كشه‌م هێزێكی تایبه‌تی سوپای عێراق ئۆپه‌راسیۆنێكی مه‌یدانییان له شوێنی تۆپبارانه‌كان ئه‌نجام دا و دوای پشكنین و به‌دواداچوونه‌كان، ته‌رمی 5 تیرۆریستی داعشیان دۆزییه‌وه.
ئاماژه‌ی به‌وه‌ش دا كه جگه له دۆزینه‌وه‌ی ته‌رمه‌كان، چه‌ندان پارچه چه‌ك و ته‌قه‌مه‌نی و كه‌لوپه‌ل و پێداویستی لۆجیستی چه‌كدارانی داعشیش دۆزرانه‌وه و له‌ناوبران.
جه‌ختیشی كرده‌وه كه هێزه‌كانی سوپای عێراق و هێزه ئه‌منییه‌كان له پشكنینی ناوچه‌كه و به‌دواداچوونه‌كان به‌رده‌وام ده‌بن به مه‌به‌ستی له‌ناوبردنی تیرۆریستانی داعش.
کۆمێنت (0)
تا ئێستا هیچ کۆمێنتێک نەکراوە.