وەزیری دارایی و ئابووری هەرێمی کوردستان لە میانی کۆبوونەوەیەکدا لەگەڵ شاندێکی وەزەراتی پێشمەرگە دووپاتی کردەوە کە پشتیوانیی لە یەکخستنی ھێزی پێشمەرگە و چاکسازیەکانی وەزارەتەکە دەکات.
ئەمڕۆ یەکشەممە 29ـی 01ـی 2023 ئاوات شێخ جەناب وەزیری دارایی و ئابووری لە دیوانی وەزارەت پێشوازی لە وەفدێکی وەزارەتی پێشمەرگەی ھەرێم کرد کە پێکھاتبوون لە سەربەست لەزگین بریکاری وەزارەت و فەریق ڕوکن عیسا عوزێر سەرۆک ئەرکان و ژمارەیەک ئەفسەری باڵای وەزارەت.
لەبارەی ناوەڕۆکی کۆبوونەوەکە، وەزارەتی دارایی و ئابووری هەرێمی کوردستان ڕایگەیاند: ئاوات شێخ جەناب وێڕای بەخێرھاتنی شاندی میوان پشتیوانی خۆی بۆ یەکخستنی ھێزەکانی پێشمەرگە لە چوارچێوەی یەک ھێزی نیشتیمانی لەژێر چەتری حکوومەتی ھەرێم و چاکسازیەکانی وەزارەت دووپات کردەوە و بەڵێنی کارئاسانی و ھاوکاری تەواوی پێدان بۆ ڕاپەڕاندنی کارەکانیان ئەوەندەی پەیوەندی بە وەزارەتی داراییەوە ھەبێت.
ڕاشیگەیاند: لای خۆشیانەوە وەفدی میوان ستایشی پشتیوانی و کارئاسانییەکانی وەزیری داراییان کرد کە لەماوەی ڕابردوودا خەمخۆر و دڵسۆزی وەزارەتی پێشمەرگە بووە لە ڕاپەڕاندنی کارەکانیان و جێبەجێکردنی داواکارییەکانیان.
وەزارەتی دارایی ئاماژەی بەوەش داوە کە لەکۆتایی کۆبوونەوەکەدا ژمارەیەک داواکاری و پێداویستی ھێزەکانی پێشمەرگەیان خستە بەردەم وەزیری دارایی کە خۆی لە دروستکردنی باڵەخانە و پێداویستی بنکە و بارەگای مەشق و ڕاھێنانی ئەو دوو فیرقە نوێیە دەبینیەوە کە ئێستا لەژێر چاودێری و سەرپەرشتی ھێزەکانی ھاوپەیمانان لە قۆناغی مەشق و ڕاھێناندان، ئەمەش لەچوارچێوەی بەرنامەی چاکسازی حکوومەتی ھەرێمە بۆ یەکخستنەوەی ھێزی پێشمەرگە لە چوارچێوەی ھێزێکی نیشتیمانی لەژێر سەرپەرشتی وەزارەتی پێشمەرگەدا.
کۆمێنت (0)
تا ئێستا هیچ کۆمێنتێک نەکراوە.