ئێوارەی ئەمڕۆ دووشەم لەسەر چیای مامەڕووت لە دەڤەری باڵەکایەتی، برووسک لە قەڵایەکی هێزی پێشمەرگەیداوه و بەهۆیەوە دوو پێشمەرگە تەندروستیان تێکچووه، تیمەکانی پۆلیس و تەندروستی شارەدێی قەسرێ بە هانایانەوە چوون و خه‌ریكن ده‌یانهێننه خواره‌وه.
شاخەوان حوسێن بەڕێوەبەری شاره‌دێی قەسرێ بە وەکالەت بە (کوردستان تیڤی) ڕاگەیاند: کاتژمێر 6ی ئێوارەی ئه‌مڕۆ لە ڕووداوێك ئاگادارکراینەوە كه بەهۆی برووسک دوو پێشمەرگەی هێزی سیدەکان لە قەڵای چیای مامەڕووت لە هۆش خۆیان چوون.
ڕاشیگه‌یاند: راستەوخۆ تیمێکی بەهاناوەچوونمان لە پۆلیس و پزیشک و کارمەندانی فریاگوزاری ئامادە کرد و بەرەو چیاکە ڕۆیشتن، بەڵام بەهۆی بارینی بەفر و سەختی ڕێگاکە ئۆتۆمبێلەکان نەگەیشتنه شوێنەکە، بەڵام دواتر بە پیادەڕۆیی تیمەکە خۆیان گەیاندە قەڵاكه‌ی هێزی پێشمەرگە.
ئاماژه‌ی به‌وه‌ش دا: ئێستا تەندروستی هه‌ردوو پێشمەرگەیە جێگیرە و باشه، تەنیا بەهۆی برووسکه‌وه لەهۆش خۆیان چووبوون.
جه‌ختیشی كرده‌وه كه تیمه تەندروستییه‌كان فریاگوزاری سەرەتاییان بۆ ئەنجامداون و له ئێستاشدا خەریکن پێشمەرگەکان بگەیەننە بنکەی تەندروستی قەسرێ.
پەیامنێر: کەریم سمکۆ
کۆمێنت (0)
تا ئێستا هیچ کۆمێنتێک نەکراوە.