به‌گوێره‌ی ئه‌و زانیارییانه‌ی ده‌ستگه‌یشتوون بڕیاره له ئاینده‌یه‌كی نزیكدا پۆلیسی فیدڕالی كه له دوای ڕووداوه‌كانی 16ی ئۆكتۆبه‌ری ساڵی 2017 له شاری كه‌ركووك جێگیركراون، شاره‌كه جێبێڵن و هێزێكی ئه‌منی تر شوێنیان بگرنه‌وه.
سه‌رچاوه‌یه‌ك له پۆلیسی كه‌ركووك تایبه‌ت به (كوردستان تیڤی) ڕاگه‌یاند: به فه‌رمانی محه‌مه‌د شیاع سوودانی سه‌رۆك وه‌زیرانی عێراق پۆلیسی فیدڕالی كه ئێستا ئاسایشی پارێزگای كه‌ركووك و شارۆچكه‌كانی حه‌ویجه و ریاز و به‌شێكی دووبزی به‌ده‌سته‌وه‌یه، له ئاینده‌یه‌كی نزیكدا ئه‌و ناوچانه چۆڵ ده‌كه‌ن.
ڕاشیگه‌یاند: به فه‌رمانی سه‌رۆك وه‌زیرانی عێراق پۆلیسی فیدڕالی به‌ره‌و به‌غدا پاشه‌كشه ده‌كه‌ن و له شوێنی ئه‌وانیش فیرقه‌ی 11ی سوپای عێراق ئه‌ركی پاراستنی ناوچه‌كان ده‌گرنه ده‌ست.
ئاماژه‌ی به‌وه‌ش دا كه ئیتر پۆلیسی فیدڕالی كه له دوای ڕووداوه‌كانی 16ی ئۆكتۆبه‌ری ساڵی 2017 دۆسییه‌ی ئه‌منی كه‌ركووك و ده‌وروبه‌ریان پێ سپێردراوه، له ته‌واوی ناوچه‌كان نامێنن و له شوێنی ئه‌وانیش سوپای عێراق جێگیر ده‌كرێن.
ئه‌مه له‌كاتێكدایه كه له ماوه‌ی ڕابردوودا پارتی دیموكراتی كوردستان هه‌میشه پێداگیری له دوورخستنه‌وه‌ی پۆلیسی فیدڕالی له ئه‌ركی پاراستنی شاری كه‌ركووك و ناوچه‌كانی ده‌وروبه‌ری كردۆته‌وه وه‌ك مه‌رجێك بۆ ئاساییكردنه‌وه‌ی دۆخی شاری كه‌ركووك و جێبه‌جێكردنی مادده‌ی 140ی ده‌ستووری هه‌میشه‌یی عێراق.
لای خۆشییه‌وه حكوومه‌تی عێراق وه‌ك یه‌كه‌م هه‌نگاو بۆ جێبه‌جێكردنی ئه‌م داخوازییانه، بڕیاری دا سوپای عێراق له ده‌وروبه‌ری شاری كه‌ركووك بڵاو بكاته‌وه و پۆلیسی فیدڕالیش له ناوچه‌كه دوور بخاته‌وه و بیگه‌ڕێنێته‌وه به‌غدا.
په‌یامنێر / هه‌ڵۆ جه‌باری
کۆمێنت (0)
تا ئێستا هیچ کۆمێنتێک نەکراوە.