بڕیاره ئێواره‌ی ئه‌مڕۆ یه‌كشه‌م وه‌زیری ده‌ره‌وه‌ی ڕووسیا به سه‌ردانێكی فه‌رمی بگاته فڕۆكه‌خانه‌ی نێوده‌وڵه‌تی به‌غدا، به‌ڵام بۆ سبه‌ی دووشه‌م خشته‌ی كار و چاوپێكه‌وتنه‌كانی له‌گه‌ڵ به‌رپرسانی عێراق ده‌ست پێ ده‌كات.
سه‌ڵاح بامه‌ڕنی په‌یامنێری (كوردستان تیڤی) پێی ڕاگه‌یاندین: به‌گوێره‌ی ئه‌و زانیارییانه‌ی به‌ده‌ستگه‌یشتوون، بڕیاره ئێواره‌ی ئه‌مڕۆ یه‌كشه‌م سێرگی لاڤرۆڤ وه‌زیری ده‌ره‌وه‌ی ڕووسیا بگاته فڕۆكه‌خانه‌ی شاری به‌غدا، دوای دابه‌زینی له فڕۆكه ئه‌مشه‌و پشوو وه‌رده‌گرێت و سبه‌ی دووشه‌م خشته‌ی كار و چاوپێكه‌وتنه‌كانی ده‌ست پێ ده‌كات.
ڕاشیگه‌یاند: سبه‌ی دووشه‌م یه‌كه‌م چاوپێكه‌وتنی لاڤرۆڤ له شاری به‌غدا له‌گه‌ڵ فوئاد حوسێن وه‌زیری ده‌ره‌وه‌ی عێراق بێت، دواتریش له‌گه‌ڵ هه‌رسێ سه‌رۆكایه‌تییه‌كه‌ی عێراق (سه‌رۆك كۆماری عێراق، سه‌رۆك وه‌زیرانی عێراق و سه‌رۆكی ئه‌نجوومه‌نی نوێنه‌رانی عێراق) كۆ ده‌بێته‌وه.
هه‌روه‌ها ڕایگه‌یاند: چاوه‌ڕوان ده‌كرێ وه‌زیری ده‌ره‌وه‌ی ڕووسیا له میانه‌ی چاوپێكه‌وتنه‌كانیدا له‌گه‌ڵ به‌رپرسانی عێراق په‌یوه‌ندییه‌كانی نێوان به‌غدا و مۆسكۆ له گشت بواره‌كاندا تاوتوێ بكه‌ن، هه‌روه‌ها له كۆبوونه‌وه‌كاندا گفتوگۆ له‌باره‌ی به‌رژه‌وه‌ندییه ستراتیژییه‌كانی نێوان ڕووسیا و عێراق ده‌كرێ به‌تایبه‌تیش له بواره‌كانی وزه و نه‌وت و گاز بۆ ئه‌مه‌ش چه‌ند كۆمپانیایه‌كی ڕووسی هاوشانی لاڤرۆڤ له سه‌ردانه‌كه‌ی بۆ به‌غدا به‌شدارن.
سه‌باره‌ت به جه‌نگی نێوان ڕووسیا و ئۆكراینا، چاوه‌ڕوان ده‌كرێ فوئاد حوسێن وه‌زیری ده‌ره‌وه‌ی عێراق بۆچوونی وڵاته‌كه‌ی سه‌باره‌ت به جه‌نگه‌كه بۆ وه‌زیری ده‌ره‌وه‌ی ڕووسیا بخاته‌ڕوو ئه‌ویش ئه‌وه‌یه كه كێشه‌كان له‌نێوان هه‌ردوو وڵات به دیالۆك و دوور له توندوتیژی چاره‌سه‌ر بكرێن و كۆتایی پێ بهێنرێ.
فوئاد حوسێن له دیمه‌كانه‌كه‌یدا له‌گه‌ڵ سێرگی لاڤرۆڤ، ڕێزی عێراق بۆ سه‌روه‌ری هه‌ردوو وڵاتی ڕووسیا و ئۆكراینا ڕاده‌گه‌یه‌نێت.
کۆمێنت (0)
تا ئێستا هیچ کۆمێنتێک نەکراوە.