سه‌رۆك وه‌زیرانی عێراق ئه‌مڕۆ دووشه‌م فه‌رمانی به سه‌رجه‌م لایه‌نه په‌یوه‌نداره‌كان كرد دۆخی ئاماده‌یی وڵات بۆ ئه‌وپه‌ڕی به‌رز بكه‌نه‌وه بۆ ئه‌گه‌ری دروستبوونی بوومه‌له‌رزه و كاره‌سات و ڕووداوی سروشتی له‌ناكاو.
محه‌مه‌د شیاع سوودانی سه‌رۆك وه‌زیرانی عێراق له به‌یاننامه‌یه‌كدا ڕایگه‌یاند: به‌ناوی حكوومه‌ت و گه‌لی عێراقه‌وه په‌رسه و سه‌ره‌خۆشی خۆمان ئاراسته‌ی كه‌سوكاری قوربانییانی ئه‌م كاره‌ساته سروشتییه له هه‌ردوو گه‌لی برا و هاوسێ ده‌كه‌ین، هه‌روه‌ها بۆ گه‌لی خۆشمان له هه‌رێمی كوردستان.
گوتیشی: وه‌ك حكوومه‌تی عێراق بڕیارمانداوه هاوكاریی به په‌له‌ی تیمی به‌رگریی شارستانی و كه‌ره‌سته‌ی فریاگوزاری پزیشكی و سه‌ره‌تایی و سه‌به‌ته‌ی خۆراك و سووته‌مه‌نی بۆ لێقه‌وماوانی ئه‌و كاره‌ساته سروشتییه مه‌زنه له هه‌ردوو وڵات بنێرێن.
سه‌رۆك وه‌زیرانی عێراق له به‌یاننامه‌كه‌دا هه‌روه‌ها فه‌رمانیشی كرد دۆخی ئاماده‌یی وڵات و وه‌ڵامدانه‌وه‌ی خێرا بۆ كاره‌ساته سروشتییه‌كان به‌رز بكه‌نه‌وه له ئه‌گه‌ری دروستبوونی بوومه‌له‌رزه و كاره‌ساتدا.
کۆمێنت (0)
تا ئێستا هیچ کۆمێنتێک نەکراوە.