كه‌شناسی هۆشداری ده‌دات: سبه‌ی زۆر سارد ده‌بێت و چه‌ندین پله‌ بۆ ژێر سفڕ داده‌به‌زێت

به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی هه‌رێمی كوردستان هۆشداری دا كه‌ سبه‌ی هه‌ینی كه‌شوهه‌وا زۆر سارد ده‌بێت و پله‌كانی گه‌رما چه‌ندین پله‌ بۆ ژێر سفڕ داده‌به‌زێت.

كه‌شناسی سه‌باره‌ت به‌ كه‌شوهه‌وای ئه‌مشه‌و ڕایگه‌یاند: تا نیوەشەو ئەگەری کەمێک بەفربارین هەیە لە ناوچەکانى ڕۆژهەڵات و باکورى ڕۆژهەڵاتى هەرێم، بەڵام لە دوای نیوەشەوه‌وه‌ ئاسمانى هەرێم نیمچە هەور و لە هەندێ ناوچە پەڵە هەور دەبێت.

سه‌باره‌ت به‌ پێشبینی كه‌شوهه‌وای سبه‌ی كه‌شناسی ئاماژه‌ی به‌وه‌ دا: سبەى هه‌ینی نزمترین پلەکانى گەرما لە ناوچە شاخاوییەکان چەندین پلە بۆ ژێر سفرى سیلیزى دادەبەزێت و شەختە دروست دەبێت لەو ناوچانەى بەفری لێ باریوە.

هۆشداریشی دا هاووڵاتییان كه‌ کەشوهه‌وای سبه‌ی هه‌ینی زۆر سارد دەبێت و تەم دروست دەبێت لە ڕۆژهەڵات و ناوەراستى هەرێم.

به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی پلەكانی گەرمى ئێستای سەنتەرى شارەکانی به‌مشێوه‌ی خواره‌وه‌ دیاری كرد:-

هەولێر: 4

سلێمانى: 1

دهۆک: 2

هەڵەبجە: 1

کەرکووک: 6

كه‌شناسی هه‌روه‌ها ڕێژه‌ی بارانبارینی 12 کاتژمێرى ڕابردووى هەندێک لە ناوچەکانى هەرێمی كوردستانی دیاری كرد:-

هەولێر: 7.4 ملم

پیرمام: 2.3 ملم

سلێمانى: 1.5 ملم

دهۆک: 1.3 ملم

ئاکرێ: 0.2 ملم

ئامێدى: 6.6 ملم

بازیان: 2.2 ملم

دوکان: 6.4 ملم

هەڵەبجە: 4.6 ملم

هەڵشۆ: 5.4 ملم

کانى ماسى: 5.6 ملم

مانگیش: 2.6 ملم