کەمپەینی کۆکردنەوەی کۆمەک بۆ زیانلێکەوتووانی بوومەلەرزەکەی تورکیا و سووریا بەردەوامە

فەرمانگەی میدیا و زانیاری هەرێمی کوردستان جەختی کردەوە کە کەمپەینی کۆکردنەوەی کۆمەک بۆ زیانلێکەوتووانی بوومەلەرزەکەی تورکیا و سووریا بەردەوامە.

لە ڕاگەیەنراوێک فەرمانگەی میدیا و زانیاری ڕایگەیاند: لەچوارچێوەی کارەکانی حکوومەتی هەرێمی كوردستان بۆ کۆکردنەوە و گەیاندنی هاوکاری و کۆمەک بۆ زیانلێكەوتووانی بوومەلەرزەكەی وڵاتانی توركیا و سووریا، حكوومەتی هەرێمی كوردستان كەمپەینێک بۆ كۆكردنەوەی كۆمەک و هاوکاری، بۆ زیانلێكەوتووانی ئەو ڕووداوە ڕادەگەیێنێت و کەمپەینەکەش لەلایەن پارێزگا و ئیدارە سەربەخۆکانەوە سەرپەرشتیی دەكرێت.

ڕاشیگەیاند: ئێستا شوێن و هەژماری بانكیی كۆمەكییەكان لە تەواوی پارێزگا و ئیدارەسەربەخۆكانی هەرێمی كوردستان را گەیەنراوە و هەر کەس و لایەنێک بتوانێت هاوکاری پێشکەش بکات دەتوانێت لە رێگەی ئەو کەمپەینەوە کە شوێنەکانیان لە پارێزگا و ئیدارە سەربەخۆکان دیاری کراون بەمشێوەیە پێشکەش بکات:-

پارێزگای هەولێر

لە پارێزگای هەولێر شوێن و هەژماری بانکی تایبەت بەو بابەتە دیاری کراوە، کە هەژمارە بانکییەکە بریتییە لە (508) لە بانکی منارە و شوێنی تایبەتیش بۆ کۆکردنەوەی کۆمەک و هاوکاری لە بەردەم پارکی شانەدەر دیاری کراوە.

پارێزگای سلێمانی

لە پارێزگای سلێمانیش شوێن و هەژماری بانکی تایبەت دیاری کراوە، کە هەژماری بانکییەکە بریتییە لە (8095) بە دینار و (1886) بە دۆلار. هەروەها لە مۆزەخانەی نیشتمانیی ئەمنەسوورەکەش شوێنی تایبەتیش بۆ کۆکردنەوەی کۆمەک و هاوکاری دیاری کراوە.

پارێزگای دهۆک

لە پارێزگای دهۆکیش مزگەوتی (جودی، قازی محەممەد، حاجی ئیبراهیم ماسیکی، شەهید مەلا ئەمین) و باڵەخانەی (قوتابخانەی چرا) بۆ کۆکردنەوەی کۆمەک و هاوکارییەکان دیاری کراون.

پارێزگای هەڵەبجە

لە پارێزگای هەڵەبجەش شوێنی کۆکردنەوەی کۆمەک و هاوکارییەکان دەکەوێتە بەرامبەر شارەوانیی هەڵەبجە و لە ناحیەی خوڕماڵیش، باڵەخانەی کتێبخانەی گشتی خورماڵ بۆ کۆکردنەوەی کۆمەک و هاوکارییەکان دیاری کراوە.

ئیدارەی زاخۆ

لە ئیدارەی سەربەخۆی زاخۆ بەڕێوەبەرایەتیی لاوان و لە قەزای باتیفا، بەڕێوەبەرایەتیی کشتوکاڵ، بۆ کۆکردنەوەی ئەو کۆمەک و هاوکارییانە دیاری کراون. هەروەها ژمارە تەلەفۆنەکانی( 07504226850 - 07505303133 – 07504590885)، بۆ کۆکردنەوەی ئەو کۆمەک و هاوکارییانە دیاری کراون.

ئیدارەی ڕاپەڕین

لە ئیدارەی سەربەخۆی راپەڕینیش سەرۆکایەتیی زانکۆی راپەرین لە شاری رانیە و ناوەراستی شار لە فلکەی هاتووچۆ لە شاری قەڵادزێ بۆ کۆکردنەوەی کۆمەک و هاوکارییەکان دیاری کراون.

ئیدارەی گەرمیان

لە ئیدارەی سەربەخۆی گەرمیانیش ماڵی حاجی ئاهوی خێرخوازی لە کەلار و جووتسایدی ماڵی گەنجان لە ناحیەی ڕزگاری و بەڕێوەبەرایەتیی چاودێری کۆمەڵایەتی لە قەزای کفری بۆ کۆکردنەوەی ئەو کۆمەک و هاوکارییانە دیاری کراون.

ئیدارەی سۆران

لە ئیدارەی سەربەخۆی سۆرانیش هەژماری بانکی(4677) لە بانکی دیلمان و مزگەوتی سەروەران و فلكەی ناوبازاڕ بۆ کۆکردنەوەی کۆمەک و هاوکارییەکان دیاری کراون. لە هەمان کاتدا چەند ژمارە تەلەفۆنێک دیاری کراون کە هەر یەکەیان لە ناوچەیەکە، لەوانەش (07509165636 ) لە سۆران، (07507579565) لە رەواندز ، (07502464245) لە چۆمان، و (07504565592) لە سیدەکان.

فەرمانگەی میدیا و زانیاری ئاماژەی بەوەش داوە کە كەمپینی کۆکردنەوەی كۆمەک و هاوکاری بۆ زیانلێكەوتوانی بوومەلەرزەكەی وڵاتانی توركیا و سوریا، درێژكراوەی دەستی هاوكاری هەرێمی كوردستانە، كە دوای رووداوەكە و بە بڕیاری مەسرور بارزانی سەرۆكی حكوومەتی هەرێمی کوردستان، سێ تیمی لە هەرێمی كوردستانەوە ڕاسپێردران بۆ هاوکاریکردن و ڕەوانەی تورکیا کران.