فوئاد حوسێن: كۆبوونەوەكانمان لەگەڵ بەرپرسانی ئەمەریكا بەرهەمدار و گرنگ بوون

فوئاد حسێن، وەزیری دەرەوەی عێراق ڕایگەیاند، تێگەیشتنێكی ڕوون لە لایەنی ئەمریكییەوە هەیە سەبارەت بەو هەنگاوانەی عێراق بۆ چاكسازی لە ئابووری و سیاسەتی دراوی و داراییدا گرتوویەتییەبەر.
فوئاد حسێن، وەزیری دەرەوەی عێراق لە چاوپێكەوتنێكدا لەگەڵ كەناڵی حوڕە، گوتی: كۆبوونەوەی چڕوپڕ لەگەڵ بەرپرسانی ئەمەریكا ئەنجام دراوە، بۆ گرنگیدان بە پرسەكانی پەیوەست بە دۆخی ئابووری و وزە، لەوانەش پرسەكانی وەبەرهێنانی غاز، هەروەها پرسی هاوكاری حكومەت و كۆمپانیا ئەمریكییەكان لەم بوارەدا.
هەروەها دووپاتی كردەوە كە لەگەڵ جۆن كێری ،نێردەی تایبەتی ئەمریكا بۆ كەشوهەوا تاوتوێی گۆڕانی كەشوهەوایان كردووە و ئاماژەی بەوەشدا كە عێراق پڕۆژەی جۆراوجۆر و هەروەها ڕەشنووسی یاداشتێكی لێكتێگەیشتنی لەگەڵ ئەمریكا لەم بوارەدا پێشنیار كردووە .
هاوكات وەزیری دەرەوەی عێراق ئەو دیدارانەی لە واشنتۆن لەگەڵ بەرپرسانی ئەمەریكا ئەنجام دراون بە "بەرهەمدار و گرنگ" وەسف كرد و باسی لە "پشتیوانی ڕوونی ئەمریكا بۆ سیاسەتی حكومەت لە بواری ئابووریدا" كرد.
هەروەها جەخیتی لەوە كردەوە كە نوێنەرانی وەزارەتی خەزێنەی ئەمریكا هەوڵدەدەن پاڵپشتی لە سیاسیەتی دراوی بانكی ناوەندی عێراق بكەن.