وەزارەتی خوێندنی باڵا زەمالەی خوێندنی لە وڵاتی هۆڵەندا ڕاگەیاند

وەزارەتی خوێندنی باڵای هەرێمی کوردستان ئەمڕۆ سێشەممە 14ـی 02ـی 2023 زەمالەی خوێندنی ماستەر و کۆرسی ڕاهێنان لە وڵاتی هۆڵەندا ڕاگەیاند.

لە ئاگادارییەکدا وەزارەتى خوێندنى باڵا و توێژینەوەى زانستى هەرێمی کوردستان ڕایگەیاند: فەرمانبەران و مامۆستایانى وەزارەت ئاگادار دەکەینەوە کە وڵاتی هۆڵەندا کۆرسی خوێندنی ماستەر و ژمارەیەک کۆرسی ڕاهێنان، بەناونیشانی (Orange Knowledge Programme) ڕاگەیاندووە.

ڕاشیگەیاند: بۆ ئەم مەبەستە هەر کەسێک مەرجەکانی بەرنامەکەی تێدا بەرجەستە بێت و ئارەزووی خوێندنی لە زانکۆکانی وڵاتی هۆڵەندا هەبێت و بیەوێت بەشداری لە کۆرسەکانی ڕاهێنان بکات، بە لەبەرچاوگرتنی ئەم تێبینیانەی خوارەوە، دەتوانێت داواکاری لە ڕێگەی ئەم لینکەی خوارەوە پێشکەش بە سەرچاوەی زەمالەکە بکات:-

https://www.studyinnl.org/fina.../orange-knowledge-programme

ماستەر:

- پێشکەشکار دەبێت مامۆستا یاخود فەرمانبەر بێت لە یەکێک لە دامەزراوەکانی وەزارەتی خوێندنی باڵا و توێژینەوەی زانستی.

- پێشکەشکار دەبێت بە لایەنی کەم دوو ساڵ خزمەتی هەبێت لەپاش بە دەستهێنانی دوایین بڕوانامەى.

- پێشکەشکار دەبێت کۆنمرەی بەکالۆریۆسی لە (65%) کەمتر نەبێت.

- ئاستی توانستی زمانی داواکراو لە بەرنامەیەک بۆ بەرنامەیەک جیاوازە، بۆیە بەر لە پێشکەشکردن، تکایە تەواوی وردەکارییەکانی ئەم بەرنامەیە بخوێننەوە کە داواکاری بۆ پێشکەش دەکەن.

- داواکار دەبێت لە هەمان بواری خۆی داواکاری بۆ بەرنامەی ماستەر پێشکەش بکات. (واتا بەکالۆریۆس و ماستەرەکەی لە هەمان بوار بێت).

- کاندیدی سەرکەوتوو لەلایەن وەزارەتەکەمان تەنها مۆڵەتی خوێندنی پێ دەدرێت، واتا بەموچەی بنەڕەتی و دەرماڵە جێگیرەکان.

- کاندیدی سەرکەوتوو لەلایەن وڵاتی هۆڵەندا پشتگیری دارایی دەکرێت، بۆ وردەکاری زیاتر تکایە سەردانی ماڵپەڕی زەمالەکە بکەن.

- پێشکەشکردن ڕاستەوخۆ تەنها لە ڕێگەی ماڵپەڕی سەرەکی زەمالەکە (وڵاتی هۆڵەندا) دەبێت.

کۆرسی ڕاهێنان:

بۆ کۆرسەکانی ڕاهێنان وەزارەتەکەمان هیچ مەرجێکی نییە، بەڵام کاتێک داوای نووسراوی پشتگیری دەکرێت، پێویستە سەرەتا نووسراو لە فەرمانگەکەی خۆت بهێنێت، ئەوکات وەزارەت دەتوانێت پشتگیری کاندید بکات.

تێبینی:

- بۆ زانیاری زیاتر تکایە لینکی زەمالەکە بە وردی بخوێنەوە.

- هەرکەسێک مەرج و ڕێنماییەکانى تێدا بەرجەستە نەبێت، دواجار مۆڵەتی خوێندنی پێنادرێت.

- تکایە بۆ هەر پرسیارێک یان زانیاری زیاتر، سەرەتا سەردانی ماڵپەڕی زەمالەکە بکەن.